Naangol ang usa ka lalaki nga driver sa sports utility vehicle (SUV) human siya nabangga sa Lunes sa kaadlawon, Marso 25, 2024 sa cement mixer truck sa north bound nga habig sa Cebu South Coastal Road (CSCR), Brgy. Tanke, dakbayan sa Talisay.

Ang biktima giila nga si Neri John Arrogancia, nagtrabaho sa business process outsourcing (BPO), driver sa SUV, taga Brgy. Guadalupe, dakbayan sa Sugbo.

Si Jonathan Tumulak, pangu sa City of Talisay Traffic Operations and Development Authority (CT-TODA), niingon nga gikan sa Minglanilla si Arrogancia ug padung sa Cebu City atol sa hitabo.

Kurbadahun ang dapit nga nahitungod sa yarda sa trak nga gimaneho ni Argie Banzon, niagi ang biktima.

Si Banzon, ang trak ug SUV, naa pa sa kustodiya sa kapulisan sa pagsuwat ning taho sa Lunes sa gabii, dugang ni Tumulak. / REV