HILABIHAN ang kasuko sa suspek human siya gipasakaan og kasong lugos hinungdan nga iyang gipamatay ang usa ka pamilya alas 9:40 sa gabii, Martes, Mayo 14, didto sa Sitio Guilon, Barangay Marilog, Marilog District, Davao City.

Ang mga biktima nailhang sila Liza Ominloy Ponce, 49-anyos, inahan; Christine Ominloy Ponce, 29-anyos; Ana Ominloy Ponce, 14-anyos; ug Rey Ominloy Ponce, 5-anyos, pulos nagpuyo sa Sitio Guilon.

Sa imbestigasyon sa Marilog Police Station, migula nga nakahiagom og daghang samad tinigbasan ug pinusilan ang mga biktima nga maoy hinungdan sa ilang kamatayon.

Giingong nga gipanigbas una sa suspek samtang nangatulog ang mga biktima dayon gipamusil gamit ang caliber 5.56 mm diin siyam ka mga bala ang nakalas.

Sa pagsubay sa otoridad, nailhan ang suspek nga si Randy Silay Balagisi, alyas Randy Alba, 23-anyos, miyembro sa Cafgu Active Auxiliary (CAA), ubos sa 16IB, 2nd Division Philippine Army, nga nakabase didto sa Barangay Gumitan Patrol Base.

Ang rekord sa pulis nagbutyag nga napasakaan og kasong lugos ang suspek pinaagi ni Mayle Ominloy Ponce, anak nga babaye sa biktima nga si Liza Ominloy Ponce.

Septiyembre 2018, napasaka ang kasong lugos batok sa suspek didto sa City Prosecutor's Office.

Sa pinakaulahing report, pinaagi sa gihimong hot pursuit operations sa kapulisan sa Marilog, nasayran nga ilang napatay ang suspek human misukol dihang dakpon na unta.

Uban sa operation ang hepe sa Marilog police nga si Major Estrello Ramiso ug mga miyembro sa CAA ubos sa 89 IB diin ang pagsukol sa suspek sa pinusilay milungtad og 20-minutos.