TAGUM CITY, Davao del Norte -- Wa pa man nahatud sa hingpit nga kapahulayan ang unang biktima sa pagpamusil ning bulana, lain na sab nga biktima sa pagpamusil ang natala alas 8 sa gabii, Huwebes, Disyembre 5.

Ang biktima giila nga mao si Jake Cabuslay, 36, minyo, gold chemist ug molupyo sa nahisgutang dapit.

Subay sa report, nasayran nga ang biktima sakay sa gimanehong motorsiklo nga naglabigar sa dalan apan pag-abot sa Tagum City, gipusil sa wala mailhing armado tumong sa nagkadaiyang bahin sa lawas nga miresulta sa hinanaling kamatayon.

Human sa gihimong pagpamusil, ang suspek nagdaling mikagiw palayo sa wala masayring direksiyon.

Narekober gikan sa crime scene ang upat ka mga basiyo sa bala sa 9m caliber pistol.

Kahinumdoman nga niadtong adlaw’ng Martes, gipusil sab sa wala mailhing mamumuno si Kagawad Ananias Broho sa Brgy. Magugpo South kon diin hangtud ning pagsuwat, wala pa mailhi ang suspek.

Naglaum ang katawhan sa siyudad nga masugpo na ang sunod-sunod nga pagpamusil sa siyudad nga nikalas sa mga kinabuhi dili lamang sa mga opisyal kundi lakip na sa mga ordinaryong mga tawo. (Dexter T. Visitacion)