GISULTI ni Konsehal Edgar Ibuyan Jr. sa Davao City nga ang hiniusang paningkamot sa "security forces" ug sa lokal nga panggamhanan aron nga mapabilin ang "insurgency-free" nga kahimtang sa dakbayan.

“It’s not a one-person mandate. It’s a consolidated effort of the Armed Forces of the Philippines, Philippine National Police, government officials, and of course mga katawhan sa siyudad sa Davao,” butyag ni Ibuyan, Hunyo 8.

Si Ibuyan, kinsa maoy tsirman sa Committee on Anti-Terrorism ug Committee on Public Works and Highways, nagsulti nga ang tinguha nga mapabilin ang insurgency-free nga kahimtang kinahanglan nga “common goal of the city.”

Ubos sa Anti-Terrorism Committee, kon diin bag-o nga komite nga gimugna atol sa pagsugod sa incumbent 20th City Council, gibutyag ni Ibuyan nga kasamtangan silang nagtuon sa panginahanglan sa Davao sa pagtubag sa mga butang nga dunay kalambigitan sa terorismo ug insurhensiya.

“We are waiting on the recommendation of our various offices from the AFP, PNP nga kung unsa tong mga pamalaod nga puwede mabuhat para sa siyudad sa Davao,” pagtin-aw niya.

Usa sa nag-unang gitutokan mao ang pagpugong sa pagsulod sa grupo sa mga rebelde ug ang pag-ila sa mga terorista.

“The goal is kung asa ta nag-chairperson, magkaroon gyud og ordinansa na may kabulohan. Dili ta puwede basta-basta magbuhat og ordinansa without the expertise of our security forces,” esplikar ni Ibuyan.

Niadtong Abril, gisaulog sa Davao City ang unang anibersaryo sa insurgency-free status sa dakbayan.

Ang Konseho sa siyudad nagdekalra sa Davao City isipi insurgency-free niadtong Marso 24, 2022 pinaagi sa Resolution 0115-22 nga gipasar niadtong Hulyo 19 sa maong tuig.