ANAA na sab sa No. 1 ang Davao City sa talaan sa Department of Health (DOH) nga dunay pinakataas nga ihap sa nagka-Covid.

Ikatulong higayon kini sa siyudad sa Davao sa bulan sa Oktubre, gipildi niini ang mga lugar sa Kaulohang Manila.

Nagkataas ang kaso sa Davao ug lagmit mapasanginlan niini ang pagkagahi og ulo sa pipila nga wa na mituman sa social distancing.

Gani, ang mga adlaw sa Davao City daw normal kaayo, sama sa wala pa ang pandemya. Apan pagkakita ani ni Mayor Sara Duterte-Carpio nga sitwasyon, daw gihinay-hinayan og balik ang pipila ka kamandoan sa panahon sa enhanced community quarantine.

Nagsugod kagahapon ang 24-oras nga liquor ban sa dakbayan, ang curfew gisayohan, ug lagmit mosunod pa ang pipila ka istrikto nga kamandoan sa community quarantine.

Usa lang gyod ang makatabang sa pagbugno sa virus, mao ang pagsunod sa mga gipatuman sa gobyerno, ang social distancing, paghugas sa kamot gamit ang sabon ug tubig, pagsuot og face mask ug face shield ug ang di magpunay og gawas sa balay kung wala man lang importante.

Di gyud nato maangkon ang kadaugan batok aning Covid kung magginahi kita og ulo, kon di kita mosunod sa mga health protocols.

Mosunod kita, kaayohan nato ning tanan. Kinabuhi ang nakapatad ngari.