SUGDAN karong Sabado, Setyembre 24, ang Iligan City Diyandi Festival Mayor Celso Regencia Open Chess Tournament didto sa Don Juana Actub Lluch Memorial Central School.
Tam-is nga cash prize ang naghulat sa mga mananaog diin mokabat tanan sa P42,500.
Mouli ang kampyon sa P15,000 nga cash prize, samtang mobitbit og P8,000, P5,000, P3,000 ug P2,000 ang modaog sa ika-duha, ika-tulo, ika-upat ug ika-lima nga pwesto, sunod-sunod.
Dili lang kana, adunay tag P1,000 matag usa ang molanding sa ika-unom paingon sa ika-napulo nga pwesto.
Gidahom nga dayohon ang torneyo gikan sa kadalaing lugar sa Northern Mindanao.
Sa Cagayan de Oro lang, gikataho nga sobra napulo ka mga kagay-anon ang modayo nga gipangulohan nila National Master Rustum Tolentino ug Johnnel Balquin.
Dili sab magpa-alkansi ang Iligan City diin naa sila Fide Master Victor Bruce Lluch ug si Bent Largo nga modepensa sa ilang lugar labina nga magsaulog sa ilang kapistahan.
Naa sab side event alang sa kiddies division.