GIDEKLARAR sa Department of Agriculture –Bureau of Animal Industry (DA-BAI) ang dakbayan sa Sugbo isip labing maayo nga nipatuman sa programa aron pakigbatukan ang rabies sa tibuok Central Visayas.
Ang National Rabies Prevention and Control Committee pinangulohan ni Dr. Simeon Amurao Jr., nideklarar sa Cebu City isip “Best LGU Rabies Program Implementer.”
Sila si Mayor Tomas Osmeña ug Dr. Alice Utlang, pangulo sa Department of Veterinary Medicine and Fisheries (DVMF) kinsa maoy nangulo sa pagpakigbatok sa rabies giimbitar sa DA-BAI nga moadto sa Diliman, Quezon City sa Metro Manila aron dawaton ang award karong Septiyembre 28.
Atol usab sa maong adlaw, saulogon sa dakbayan sa Sugbo, ang “World Rabies Day” ug ang DVMF molusad og halapad nga bakuna sa mga iro sa Plaza Sugbo, atubangan sa legislative sa Cebu City Hall.
Si Utlang nagkanayon nga gihatagan sila og 5,000 ka doses nga bakuna gikan sa DA-BAI nga gitagana alang sa 5,000 ka mga iro atol sa kalibutanong kasaulogan sa rabies.
Giawhag sa pangulo sa DVMF ang mga tag-iya og iro sa pagdala sa ilang binuhi nga hayop sa Plaza Sugbo sanglit way bayad ang maong bakuna.
Atol sa maong adlaw, hingusgan usab sa operatiba sa DVMF ang ilang kampanya sa pagpanakop sa mga iro nga gipasagdan sa mga tag-iya ug isyuhan og citation ang mga tag-iya nga nagkantidad og P2,000 subay sa Animal Welfare Act ug City Ordinance.