ILIGAN CITY -- Sobra 70 ang gipaabot nga mga entrante sa kadalaing pulo sa Visayas ug Mindanao sa Iligan City Dyandi Festival Mayor Celso Regencia Chess Open Tournament, diin kamulo pa nagdawat og rehistrasyon Sabado, Septyembre 24.
Abot gikan Cebu City ang nikompirma nga mosalmot sa duha ka adlaw nga torneyo (kagahapon ug karon) nga gipangulohan ni International Master Kim Steven Yap.
Nakuha ni Ronaldo Banaag, usa ka chess patron ug chess blogger sa Northern Mindanao, ang kompirmasyon ni Yap agi sa iyang pahayag sa Knights of the Square Table account sa Facebook.
Ang alas sa Bukidnon nga si Jeriel Manlimbana nipahayag sab sa iyang partisipasyon.
Gikan sa Panabo City, nakigduyog si Jason Salubre sa Kagayanong si Johnnel Balquin sakay sa bus paingon dinhi. Si Salubre usa ka kanhi saligando sa De La Salle University alang sa kulbahinam nga UAAP, samtang nikampyon bagohay lang si Balquin sa Kidapawan Open.
Uban sab nga mga Kagayanon nga moapil sa karambola mao sila National Master Rustum Tolentino ug Nazario Ubanan. Nasapon sad nako ang alas sa Gingoog City nga si Allan Cantonjos bitbit og prutas nga iyang napalit sa merkadong publiko dinhi. Mahilig og kaon sa prutas si Cantonjos bago pa modula sa torneyo.
Bugat sab ang linya kung makompirma ang partisipasyon ni NM Henry Lopez, kababayan ni Salubre.
***
Hingpit ang seguridad dinhi sa Iligan, diin magsaulog ang dakbayan sa ilang kapistahan karong Septyembre 29.
Sa pagpasulod sa bus sa Iligan, hugot ang mga checkpoint ngari susama sa Davao City. Gawas niana, hilom nakatago ang duha ka tangki de gira.
Pipila ka mga kasundalohan dala og high powered rifle matag usa ang gipang-deploy sa mga pangpubliko nga lugar apil na sa mga bar.
Usa sa mga lumolupyo dinhi niingon red alert ang dakbayan karon sukad gibombahan ang Davao City, lugar ni Presidente Rodrigo Duterte.