ILIGAN CITY -- Gitakda nga isarado karong umaabot Septyembre 27 adlaw'ng Martes ang mga dagkung dalan sa sentrong bahin ning dakbayan alang sa ipahigayon nga "street dancing" alayon sa Diyandi Festival 2016 o ang usa ka bulan nga pagsaulog sa tinuig nga kapistahan sa dakbayan.
Kini nga dalan mao ang Quezon Avenue ug Aguinaldo Streets gikan alas-6 sa buntag hangtud nga moagi na ang kinse ka mga partisipante gikan sa pantalan paingon ngadto sa Anahaw Amphitheater sa Buhanginan Hills sa City Hall, Barangay Pala-o.
Ang street dancing ug showdown competition usa sa mga "highlight" sa Diyandi Festival nga gitawag og Sayaw Saulog.
Matud ni Konsehal Sol Bacsarpa, chairman sa Diyandi Executive Management Board, nga karong tuiga, adunay duha ka mga kategorya, ang Category A: Battle of Winner ug Category B: Inter-School. Lima ang kumpirmado'ng entry sa Category A samtang 10 ang entry sa Category B.
Ang mga partisipante sa unang kategorya gilangkuban niadtong mga mananaug sa street dancing sa tuig 2013 hangtud sa tuig 2015. "We expect more from them in terms of concept ug kung unsaon nila pag-execute ang kadaugan ni Sr. San Miguel batok sa dautan," pasabot ni Bacsarpa.
Ang mga partisipante sa ika-duhang kategorya mga "first timers" o wala pa sukad makasalmot sa Sayaw Saulog street dancing and showdown competition.
"We give them the opportunity to showcase kung unsa ang ilang huna-huna o concept sa mga cultural presentation," dugang ni Bacsarpa.