NAGSALO sa liderato sila Nazario Ubanan, Allan Cantonjos ug duha pa human sa ika-upat nga round atol sa Iligan City Diyandi Festival Mayor Celso Regencia Open Tournament niadtong Sabado, Setyembre 24, sa gabie didto sa Donya Actub Lluch Memorial Elementary School.
Garbo sa Barangay Consolacion sa Cagayan de Oro City, nitala si Ubanan og limpyong upat ka puntos uban nila Cantonjos sa Gingoog City, Jason Salubre sa Panabo City ug ang beteranong National Master sa Pagadian City.
Iyang nabiktima ang second seed nga si Fide Master Victor Bruce Lluch sa Iligan City sa usa ka Pirc Austrian Attack atol sa ilang panagsangka sa top board sa mao nga round.
Uban nga resulta sa nga 4-pointers, gipildi ni Cantonjos ang magulang nga Canino nga si Romeo sa board three.
Daog sab si Salubre kang Jovy Edades sa Iligan City sa board two, samtang giparot ni Absin si Bernardo Mandrazo sa board five.
Nagsunod kanila nga adunay 3.5 puntos matag usa mao ang kagay-anon nga sila National Master Rustum Tolentino ug Johnnel Balquin.
Nakasalo sab sila Bengt Largo, Faisal Amanggay ug usa pa sa susamang iskor.
Nisurprisa ang magsuong Canino nga sila Romeo, Ronald ug ilang manghod nga babae nga si Ruelle human miposti og tres puntos matag usa.
Sila Romeo ug Ronald mao lang nga mga batanon nga nitungtong sa top boards sulod sa upat ka rounds nga aksyon.
Ang kamanghurang babae aduna lang usa ka pildi gikan sa kamot sa iyang igsuon sa ika-tulo nga round.