USA ka kiddie chess player gikan sa Munisipyo sa Jasaan ang nisuprisa atol sa Diyandi Festival Mayor Celso Regencia Open Chess Tournament niadtong Dominggo, Setyembre 25, sa gabie sa Don Juana Actub Lluch Memorial Elementary School, dakbayan sa Iligan.
Walay nagdahum nga usa ka kiddie ang makalahotay pagposti og unom ka puntos sulod sa walo ka round nga open tournament.
Apan, nahimo sa 12-anyos nga Clyde Harris Saraos nga wala nabuhat sa uban nga mga kiddie player.
Naangkon pa ni Saraos ang respeto nga usa ka giant-killer human gipildi niya ang master-caliber nga si Jezreel Lopez sa Pagadian City sa kataposang round.
Nilanding si Saraos sa ika-13 nga pwesto ug naangkon pa ang top-kiddie player ug ang P2,000 nga cash prize.
“Pachada ni nga exposure ni Clyde para sa iyang Shell,” ingon sa iyang coach ug trainor nga si Johnnel Balquin, kinsa nisulod sa top-10 sa maong torneyo.
Usa si Saraos ang ni-qualify ug modula sa umaabot nga Shell National Youth Active Chess Championships grandfinals karong Oktubre 1-2 didto sa SM Megamall, Mandaluyong.