SURPRISANG nikampyon ang garbo sa Iligan nga si Fide Master Victor Bruce Lluch atol sa Diyandi Festival Mayor Celso Regencia Open Chess Tournament niadtong Dominggo, Setyembre 25, sa gabie sa Don Juana Actub Lluch Memorial Elementary School, dakbayan sa Iligan.
Bangis nga nibangon si Lluch gikan sa iyang kamaomaong kapildihan gikan sa kagay-anong si Nazario Ubanan sa ika-upat nga round.
Gikan ana, giharos ni Lluch ang iyang sunod-sunod nga mga round apil na ang pagpildi sa kagay-anong si Johnnel Balquin sa kataposan nga round.
Paghuman sa ika-walo ug kataposang round, nikolekta si Lluch og pito ka puntos parehas kang Cagayan de Oro National Master Rustum Tolentino.
Apan, gikinahanglan nga magamit ang bucholz tie-breaker human daan na gianunsyo sa organizer nga “no pooling” o walay binahinay sa cash prize kung ugaling adunay magparehas og iskor.
Naangkon ni Lluch ang unang pwesto ug ang P15,000 nga cash prize human milamang og usa ka punto sa tie-break points batok kang Tolentino, kinsa niangkon sa ika-duha nga pwesto ug ang P8,000 nga cash prize.
Nipwesto ang Iliganon nga si Bengt Largo, Jason Salubre sa Panabo City ug Jones Maghuyop sa Pagadian City sa ika-tulo, ika-upat ug ika-lima nga pwesto, sunod-sunod, nga parehas adunay 6.5 puntos matag usa.
Niadtong Sabado, Setyembre 24, nagsalo sila Ubanan, Allan Cantonjos sa Gingoog City, National Master Ernesto Absin sa Pagadian City ug Salubre sa liderato nga adunay limpyong upat ka puntos.
Gani, naangkon pa ni Salubre ang solong liderato human sa ika-lima nga round apan nabura kini human milakag ang hingpit nga nagsunod.
Aron makompleto ang top ten, nilanding sila Cantonjos, Absin, Faisal Amanggay, Balquin ug National Master Fernandito Pialan sa ika-unom paingon sa ika-napulo nga pwesto, sunod-sunod.
r