USA ka gidudahang big-time drug pusher nga gii-ngong sakop sa drug lord sa habagatang Sugbo napatay sa pinusilay tali sa kapulisan sulod sa usa ka motel compound sa Mabolo, dakbayan sa Sugbo, gabii sa Septiyembre 26, Lunes.
Si Jay Jareño, taga Barangay Matab-ang, Toledo City, namatay sa mga samad pinusilan sa iyang kalawasan.
Dali siyang gidala sa Mandaue City Hospital sa mga sakop sa Regional Special Operations Group (RSOG) 7, apan patay na kining naabot.
Matod sa RSOG, nakuha gikan ni Jareño ang tulo ka medium nga putos sa shabu, usa ka .22 caliber revolver, 10 ka mga bala ug P3,000 nga papel de banko nga gigamit sa buy-bust.
Usa ka intelligence officer, nga di gustong nganlan, niingon nga si Jareño naa sa listahan sa 10 ka drug personalities sa Toledo City.
Gikataho nga nagkuhaan siya og supply gikan kang Franz Sabalones.
Si Sabalones nitahan kang Police Director General Ronald dela Rosa human ang iyang igsuon nga si San Fernando Vice Mayor Fralz Sabalones gitumbok ni Presidente Rodrigo Duterte nga usa sa mga narcopolitician niadtong Agusto 8.
“High-value target na namo siya. Ang iyang mga tawo naay mga armas,” hulagway sa opisyal kang Jareño.
Si Jareño giingon nga dunay daghang mga informant hinungdan nga kanunay nga mapakyas ang mga pulis sa pagdakop kaniya.
“Dili ni siya magpakita sa publiko. Idlas ni siya,” nagkanayon ang opisyal sa phone interview.
Sa 2011, si Jareño nadakpan sa mga pulis ug gipasakaan og kaso sa paglapas sa Republic Act 9165 kun Comprehensive Dangerous Drugs Act of 2002 tungod sa pagpamaligya og shabu.
Ang huwes nitugot kaniya sa pagpiyansa tungod sa giingong huyang nga ebidensya.
Girapido
Mga pipila ka oras sa wa pa mapatay si Jareño, ang balay sa iyang sakop nga giingon nga maoy iyang tuong kamot girapido sa wa pa mailhing mga tawo.
Niresulta kini sa kamatayon sa babayeng upat ka buwan nga mabdos.
Nagtuo ang kapulisan sa Toledo City nga giunay sa iyang mga kauban si Inad Juarez, taga Brgy. Matab-ang, bukirang barangay sa Toledo.
Nakaeskapo si Juarez, apan nasamdan ug namatay ang iyang kapuyo nga si Rosebie Cantabaco, 18, kinsa piyansado usab sa kaso sa illegal nga drugas.
Si PO2 Joselito Genon sa Toledo Police Station nga nahinabi sa Superbalita Cebu nagkanayon kagahapon sa alas 7:00 sa buntag na sila nahibawo sa hitabo human gi-report sa mga silingan.
Matod niya nga sila si Cantabaco ug Juarez nangatulog na sa sulod sa payag dihang girapido sa wa mailhing tawo.
Base sa ilang nakuha nga mga kabhang, ang gunman diha magtago sa bakilid nga bahin sa dapit, ubos sa nahimutangan sa payag.
Matod ni Genon nga nakabawos si Juarez base usab sa ilang nakuha nga mga basiyo sa Carbine rifle.
Apan wa na nila igkita si Juarez.