MOABLI na ugmang adlawa ang online registration sa Cobra Ironman 70.3 Philippines nga gituohang kusog pa unya sa hotcake.
Sa niaging tuig, ang registration mikulit og record human ang organizers nakakuha gilayon og 2,900 ka mga entries sulod lang sa 28 minutos alang sa 2016 Cobra Ironman Asia Pacific 70.3 Championships nga gipahigayon niadtong Agusto 7.
Ang 1.9-kilometer nga langoy, 90 kilometro nga bisikleta ug 21 kilometro nga dagan nakakulit sa uwahing rating og 91 percent gikan sa mga partisipante.
Si Princess Galura, ang general manager sa Sunrise events Inc. (SEI), ang kompaniya nga maoy nag-ugmad sa half-Ironman races sa nasod, nagkanayon nga adunay 2,600 ka mga slots ang avialable alang sa 2017 Cobra Ironman 70.3 Philippines nga gikatakda karong Agusto 6 sa Lapu-lapu City.
Ang mga Cebuano triathletes mag-abot sa alas otso sa buntag ugma sa social hall sa Cebu Provincial Capitol, diin atoa usab didto mahimutang ang kahimanan sa online registration.
Ang mga partisipanti sa registration area sa Cebu Provincial Capitol makakuha usab og limited edition sa Cobra Ironman 70.3 jacket.
Kini maoy ikaunom nga tuig nga ang Cebu maoy host sa maong kalihukan ug ikasiyam sa tibuok nasod sukad nagsugod niadtong 2009 sa Camarines Sur.
Ang half-Ironman race motadlas sa upat ka syudad sa Sugbo nga mao ang Cebu City, Mandaue, Lapu-Lapu and Talisay City.
Adto kini manukad og motapos sa Shangri-La Mactan Resort & Spa.