KON dunay angay hingusgan sa kapolisan paggukod sa ilang kampaniya batok sa ginadiling drugas, mao kining sektor sa mga artista.
Mag tulo na ka bulan apan wa pa gyud sugdi og pagpanghipos sa PNP ang mga “adik” o “drug dealer” na mga artista.
Dugay nang nagpagawas og pamahayag ang Malacañang nga ibutyag nila ang mga artista nga naa sa ilang listahan.
Unsa say nadugayan sa pamunuon ni Presidente Duterte paghingan aning mga artista nga mga adik.
Na-impluwensiya ba kaha sila ni Robin Padilla nga mihangyo pugngan una ang pagbulgar sa mga pangalan?
Kon langayon pag-ayo sa Malacañang ang pagpagawas aning listahan, basin baya madudahan ni nga dunay gipinigan.
Timan-an nato, kining problema sa droga mikaylap na sa tibuok nasod ug dili lang sa usa ka lugar o pundok sa katawhan.
Milala na pag-ayo ang maong suliran tungod sa kapakyas sa miaging administrasyon paggukod sa mga drug lord.
Nganong dili angay nato langayon paggukod ang mga adik nga artista?
Ambot kon nasayod ba kining kapolisan nga grabe ug halapad kaayo ang impluwensiya nga gidulot aning mga artista sa katawhan – gikan sa bata ngadto sa mga tigulang.
Ug dili maayo nga panig-ingnan ang ilang hiwi nga gawi ngadto sa mga tawo nga naghimo nilang idolo.
Sama ra kini sa kaso sa mga magtutudlo, dili maayong ehemplo ang badlongan nga maestro o maestro ngadto sa ilang estudyante.
Naghinamhinam na ang mga tawo pag-ila kinsa kining mga artista nga padayong nag-inartisa sa ilang dautang kalihukan.
Unsa pa may gipaabot sa PNP ubos sa pamunoan ni Chief Ronald “Bato” Dela Rosa. Duna ba silay gipanalipdan? Unsa man nahadlok sila sa Illuminati?
Mas maayo mahibaw-an sa liderato sa PNP ug sa Malacañang nga mas matagbaw ang publiko sa ilang kampaniya sa ginadilingan droga kon sobsob ilang pagpanggukod nga walay pagpinig sa bisan kinsa nga nakalapas sa balaod.
Kon walay giila ang droga sa iyang dautang resulta niini ngadto sa katilingban, nan ingon ana usab unta ang pag-atubang sa PNP nga walay giliatan sa ilang kampaniya.
Dili tungod kay celebrity, ilado, adonahan ka, hinay usab ang pag-irog sa pagpatuman sa balaod.
Pagkakaron, igo lang sa pagtag-an-tag-an ang publiko kon kinsa kining mga adik nga artista.
Makaluluoy ang uban kay bisan dili tiggamitan og drugas apan tungod sa ilang hitsura, na-aan na hinuon nga adik.
Unta idiga na sa PNP kining listahan sa mga artista aron makita nato unsa kapatas ang kampaniya batok sa ginadiling droga sa administrasyon ni Presidente Duterte.