SI JENIELOU Mosqueda sa Davao City nakakuha og bronze medal alang sa Pilipinas sa 5th Asian Beach Games kurash competition sa Bien Dong Park sa Da Nang, Vietnam.
Ang 35 anyos nga Dabawenya, kanhi University of Mindanao (UM) judo standout, napildi sa iyang semifinal match kang Vietnamese Thin Le Thi human midaog kang Ayna Jumakulyeva sa Turkmenistan sa quarterfinals sa women's-57 kg. event.
Matod ni Mosqueda mao kini ang iyang unang higayon nga miduwa sa kurash, ang ancient martial art nga gikan sa Uzbekistan, miingon nga nag-adjust pa siya.
"Nangapa kami sa rules, sa sand and weather. Lisod (Difficult) under the heat of the sun tapos sa indoor kami nag-training without sand pa," niya pa sa Facebook interview, dugang ang balas maabot sa iyang mata.
Si Philippine Sports Commission (PSC) Commissioner Charles Raymond Maxey, sa laing interbyu miingon, "Kurash is still similar to judo but is played on sand."
Hinuon gisulti ni Mosqueda nga kahibalo na sila nga ang event dulaon dunay mats ug covered area sama sa ilang nakita sa Youtube.
Apan nakurat sila dihang nasayran nga gihimo kini sa balas ubos sa grabeng init sa adlaw.
Ang kurash technique pareha sa judo, matod niya, apan way grappling ug ang rules lahi sab sama sa uniforms.
Dugang niya, "Twelve seconds yung laro namin nung sa bronze match. Knockout system depende kung ilan kayo sa bracket. Medyo confused kami sa rules. Pag-umpisa tala ka, no chance sa medal na."
Giklaro sab niya nga nagpabilin gihapon siya sa national judo team bisan sa Asian Beach Games, nga usa siya gibutang modula sa kurash.
Ang Vietnam maoy nanguna sa kurash competition nga dunay upat ka bulawang medalya, gisundan sa Iran ug Uzbekistan nga dunay duha ka bulawan ug Chinese Taipei ug Turkmenistan nakakuha og usa bulawan matag usa. (MLSA)