GIKUSTODIYA sa Women and Childrens' Protection Desk (WCPD) sa Toril Police Station ang usa ka 13-anyos nga batang lalaki kinsa nagdala og dakong kantidad sa salapi nga walay kaubang hamtong samtang sakay sa Yellow Bus Liner (YBL) padung General Santos City, alas 6 sa gabii, Biyernes, Septyembre 30.
Si Lieutenant Colonel Nestor Mondia, detachment commander sa Task Force (TF) Davao sa Barangay Sirawan, Toril District, dakbayan sa Davao, nagbutyag nga di nila ma-istorya ang trese-anyos human di masabtan ang gisulti sa bata nga gituohang pinulongan sa tribong B'laan ug di sab kini motug-an sa iyang pangalan.
Giingon sa opisyal nga misakay ang 13-anyos sa Yellow Bus Liner (YBL) A-208 sa kanto Ulas.
Dihang misakay ang bus inspector nga si Ronald Ocay, misumbong ang konduktor kaniya nga dunay bata nga padung sa General Santos nga dunay daghang binandol nga kuwarta sud sa iyang bag.
"Nakita kasi ng conductor ang pera, pagbayad ng bata, so nagsabi naman ang conductor sa inspector niya, at doon parang natakot na ang bata at sinubukan nitong tumalon sa pintuan ng bus," saysay ni Col. Mondia.
Daling misumbong ang inspector sa mga personahe sa TF-Davao ug gikustodiya ang bata uban sa P138,600.00 nga kuwarta sud sa iyang bag.
Migula ang mga espekulasyon nga basin unya og kinawat ang kuwarta o di kaha kuwarta gikan sa revolutionary tax nga dalhon sa giingong kalihukan sa mga New People's Army nga naglihok sa bukirong bahin sa T'boli sa South Cotabato.
Gisubay sab sa kapulisan ang mga resibo nga nakuha gikan sa bag nga tupad sa mga binandol nga salapi.
Ang kapulisan sa Toril nanawagan kung kinsa ang pamilya sa bata nga modangop lamang sa ilang buhatan aron ipatubag ang hinungdan sa pagdala og dako nga salapi sa 13-anyos. (Jeepy P. Compio)