SA NAGAPADAYONG konstruksyon sa UP-Davao City Sports Complex, mas mitaas karon ang kompiyansa human ang stakeholders miuyon sa pagtuon nga mag-host sa 2019 Southeast Asian (Sea) Games nga nagkinahanglang magkahiusa.
Ang mga major key players Philippine Sports Commission (PSC), City Government of Davao ug University of the Philippines (UP) gilauman nga manguna sa pag-host sa Games nga dunay 10,000 delegado gikan Brunei Darussalam, Cambodia, Indonesia, Laos, Malaysia, Myanmar, Singapore, Thailand, Timor-Leste, Vietnam ug Singapore.
Tipik niini si UP System vice-president for development Elvira Zamora nagpahigayon og panagpulong ngadto kanila PSC chairman William Ramirez, Davao City Third District Representative Alberto Ungab, ug UP Mindanao officials Chancellor Sylvia Concepcion didto sa Quezon Hall, UP Diliman sa Quezon City niadtong Biyernes, Setyembre 30.
Si UP Mindanao Department of Human Kinetics chair Erwin Protacio sa gipadalang email, miingon nga ang importanteng preparasyon alang sa Davao City sa pag-host sa pipila ka event sa 2019 Sea Games ang gihisgutan.
“Status of the stages of completion of structures such as the football stadium, civil works of the football pitch and track oval, artificial turf and synthetic track installation and the construction of the aquatic center were reported during the meeting,” matod ni Protacio.
Niya pa ang grupo naglantaw sab og suporta sa laing ahensiya sa gobyerno, pribadong indibiduwal, corporations ug Mindanao public officials ang kinahanglan tabang kanila aron molampos kini.
Dugang niya, sila Chairman Ramirez ug Congressman Ungab maghimo og pipila ka panagpulong aron makuha ang mga kinahanglan ug suporta labina kang President Rodrigo Duterte aron mahinayon ang 2019 Sea Games hosting.
Una nang gisulti ni Ramirez sa pakighinabi sa SunStar Davao nga ang Philippine Olympic Committee (POC) gusto nga dalhon ang hosting sa dakbayan sa Davao.
Diin niadtong Hulyo, nagpadala na og technical inspection team aron mag-evaluate ug i-assess ang pasilidad ubos sa konstruksyon ug andam na ang Davao City ug Tagum City, diin anaa na ang Davao del Norte Sports and Tourism Complex.
Ang PSC inspection team misuhetisyon nga paspasan ang pagtukod sa UP-Davao City sports complex ug ang University of Mindanao sports complex ug King Dome kang Pastor Apollo Quiboloy’s Jesus Christ The Name Above Every Name mahuman sab sa 2018.
Ang maong tim gilangkuban nila Commissioners Charles Raymond Maxey ug Arnold Agustin, Ronnel Abrenica gikan sa PSC Chairman’s Office, Engineer Eduardo Clariza, Architect Noel Elnar ug Alona Quintos sa PSC planning and program department, miingon nga kulang og three-star hotels sa Davao del Norte aron moakomodar og Sea Games delegates bisan duna na silay sports facilities.
Ang Davao del Norte mag-host sa Batang Pinoy Games ug ang Philippine Olympic Committee-Philippine Sports Commission (POC-PSC) National Games karong Nobyembre samtang ang Davao City plano sab mag-bid sa 2019 Palarong Pambansa.