ADUNAY panawagan ang Bureau of Fire Protection (BFP) sa mga mamalitay og mga Christmas lights labina sa pagsugod sa “ ber months” ubay-ubay na ang mopalit niini alang sa dekorasyon.
Si Engineer Noli dela Rita, tigpamaba sa BFP-Northern Mindanao gipasabot niini nga kinahanglan gayud bantayan ang mga Christmas lights ug nagkinahanglan kini sa insaktong pag-atiman.
Unang gibutyag niini nga kung mogamit man gani og Christmas lights nga gikan pa nagamit niaging tuig kinahanglan kini limpyohan matag bulan, pasigaon aron dili puy-an og kalawang.
Kung adunay dili na mosiga dili mahimong ilisan og kober kay delikado na kini kayo.
Lakip sa iyang gihangyo aron sab malikay sa sunog mao ang dili isumpay-sumpay ang outlet sa Christmas light tungod kay kini sagad nga hinungdanan sa overloading sa kuryente nga maoy usa sa rason sa pag-ulbo sa sunog.
Tulo lamang ka mga pansakan sa series light ang pwede ra isumpay apan nagdepende gihapon sa gidaghanon.
Lakip sa angayan sutaon mao ang mga Christmas light nga alang sa gawas kon outdoor ug sulod kon indoor.
Dili mahimong gamiton sa gawas ang pang-indoor nga Christmas light tungod kay kung panahon sa pag-ulan magsila kini ug maoy sinugdanan sa sunog.
Gi-discourage usab ni Dela Rita ang katawhan sa paggamit ug Christmas lantern tungod kay delikado kini labina kung ang atop ginama sa nipa.
Gipasabot sab niini nga kung mahimo mopalit og bag-o ug siguraduhong aprobado ang mga Christmas lights sa Department of Trade and Industry. (SVB)