WALA damha nga nikampyon ang Sgt. Canoy Memorial Central School (Sgt. Canoy MCS) sa Iligan City atol sab ago nahuman nga 2016 Milo Little Olympics Mindanao Leg elementary boys chess team tournament didto sa Xavier University High School main campus, Pueblo de Oro.
Sa wala pa ang Milo, ang team sa City Central School, Corpus Christi ug West City Central School ang gilantaw nga mga paborito.
Gani, gikonsiderar sab ang mga team sa Davao City sama sa Ateneo de Davao ug A.O. Floirendo Elementary School nga mga kusog.
Apan, nasuli ang mga ekspektasyon human nilutaw ang Sgt. Canoy MCS sa ibabaw sa kataposan.
Usa ka semana bago ang Milolympics, nidula ko sa Diyandi Festival Open Chess Tournament didto sa Iligan City.
Nakita nako nga daghan-daghan sab nga mga batang chess player didto ug sinyas na kato nga usa sa mga hulga ang Iligan City.
Butyag pa ni City Central trainer nga si Johnnel Balquin nga hilom ra kaayo ang Sgt. Canoy MCS.
“Hilom ra kaayo ang pagsaka pero nagpusot-pusot,” ingon ni Balquin.
Usa ra’y punto niini, naghugot ang kompetensya sa grassroots chess dinhi sa pulo sa Mindanao.
Usa ang Bulua Elementary School nga nisuprisa sab sa torneyo nga maoy nibangga sa Sgt. Canoy MCS sa kataposang round.
*****
Naangkon ni Grandmaster Ian Nepomniachtchi sa Russia ang solong liderato human sa ika-unom nga round sa nagpadayon nga 2016 Tal Memorial didto sa Moscow, Russia.
Niposti si Nepomniachtchi og 4.5 puntos ug ligas lang og tunga sa puntos sa nagsunod nga si GM Anish Giri sa The Netherlands nga adunay upat ka puntos.
Si Giri nag-una sa niagi apan ninaog sa usa ka ang-ang human gipildi siya ni Levon Aronian sa Armenia sa ika-unom nga round.
Si Aronian, Vladimir Kramnik ug Viswanathan Anand nagsalo sa ikatulo paingon sa ikalima nga pwesto nga adunay 3.5 puntos, matag usa.