DALI ra kaayo no? Adto lang niaging semana atong gipahibalo dinhi ang konserto alang kang Mama Mary unya karon na dayong gabii ang paghimo niini.
Adto kini sa IEC Pavilion sa Mabolo.
Sila si Raki Vega, Fr. Jonas Mejares, Girlie Lapinid, Izarzuri Vidal ug ang grupong Sakdap ang manganta. Ug di lang pulos relihiyosong kanta ang ilang ipasundayag.
Ang kita niini alang sa pagtukod og dugang classroom sa Mama Mary Eucharistic Adoration Foundation School Inc. sa Lindogon, Sibonga.
Gipasiugdahan kini sa Kapandesal Multipurpose Cooperative ug giabagan sa Archdiocese of Cebu.
Ato ning suportahan bi! Mamalit tag tiket. Bahalag di na motan-aw. Dyok! Bitaw, manan-aw ta ha? Kitakits!
***
Giahak uy! Imbes nga magngisi ko nga nagtan-aw sa Magandang Buhay nila ni Jolina Magdangal, Melai Cantiveros ug Karla Estrada, wa nako mamatikdi nga nitulo akong luha sa tuo nga mata (o-ha!) samtang nagtan-aw ni Mark Pingris (kuyog sa iyang asawa nga si Danica Sotto) nga nag-asoy sa iyang kaagi sa unang panagkita nila sa iyang amahan nga Pranses duha ka tuig o kapin pa ang nilabay.
Iya kuno untang plano nga iyang sagpa-on una iyang papa (kay gibiyaan siya samtang gamay pang bata) unya iya dayong gakson ug sulti-an nga ‘I love you, Dad!’ pero wa kini niya mahimo kay naghilak na man daan iyang papa pagkakita niya.
Nihilak na lang sab kuno siyag deretso dayong gakos. Nitulo ang akong luha kay puparehas ra mig istorya sa kinabuhi. Di lang hinoon langyaw ang akong papa pero, kon si Charlotte Cinco pay pasulti-on, ‘may kaambong nga mahagpat.’ O-ha! Ana.
***
Sa pagsulat nako ani, wa pa gihapoy seguro kon madayon ba ang pag-anhi sa mga bida sa The Third Party nga sila si Angel Locsin, Sam Milby ug Zanjoe Marudo karong adlawa.
Bisan ang kalma ug poised kaayo nga promo diva nga si Josie Pereyra medyo gisapot na ning hitaboa. Ikaduha na god ni human wa sab madayon ang pagduaw sa Cebu nila ni Kathryn Bernardo ug Daniel Padilla.
May dakong hinungdan hinoon kon nganong nahitabo kini. Di lang ko mag-tell kay wa sab koy ika-tell sa pagka karon. Haha! Ana!
Basta kay patas-i lang ang antenna sa inyong mga radar aron kon mokalit lag ingon ang Star Cinema nga madayon pag-anhi sila si Angel, Sam ug Zanjoe, dasdas dayon sa ipahibalo nga venue.
Isalida ang The Third Party sugod sa Miyerkules, Oktobre 12.
***
Kahibudngan nga imbes ang pelikula ang akong daygon kay nakadaug lagi sa Venice Film Festival, ang akting ra man hinoon ni Charo Santos ug John Lloyd Cruz ang akong namatikdan.
Duna man goy mga esena sa Ang Babaeng Humayo nga lisod tuhoan. Nga may namaligyag balut unya wa gyuy laing tawo, o bisan iro man lang, nga nagtikawtikaw nga hayag man unta kaayo ang dalan.
Kon tungod kini sa kahadlok sa karakter nga Rodrigo Trinidad, wa kaayo na-establish. Nganong namaligya man ang balutero (?) kon kahibalo siyang siya ray magtikawtikaw?
Naa na bay Fortuner ug poster sa LTFRB nga nagkanayon: ‘May problema ka?
Itawag sa LTFRB’ niadtong 1997? Kon naa na, e di wow!
Dunay dakong building nga klarong bag-o ang desinyo ug kolor pero tungod kay black and white ang pelikula, di maklaro. Pasar gihapon.
Mouyon ko kang direk Olive Lamasan nga natabunan gyud ang pagkatawo ni John Lloyd sa karakter ni Hollanda. Parehas pod kang Charo sa papel nga Horacia.
Hinoon, kon itandi sa laing pelikula ni Lav Diaz nga Hele sa Hiwagang Hapis, arang-arang ning Ang Babaeng Humayo. Di kaayo daghan ang mga esena nga nagkamang. Pero taas pa gihapon ang duol upat ka oras nga gitas-on.
Mangutana mo: ‘nganong nidaug man ug gidayeg man kining mga pelikulaha sa gawas sa nasud?’ Ngano diay? Nagtuo diay mong tungod kay mga langyaw ang mga hurado, mga hawod ug batid na gyud sila?
May mga higayon baya nga makaingon ta: ‘ka-weird bag taste ning mga tawhana.’ Ana!
***
Nalingaw ko sa obserbasyon sa akong pag-umangkon nga si Marx S. Alkuino sa pagtan-aw namo sa Ang Babaeng Humayo. Gibahin man god ang oras sa pagsalida: gabii ang sa Babae samtang sa hapon ang My Rebound Girl.
Nikomedya si Marx: ‘My Rebound Girl diay ang Inengles sa Ang Babaeng Humayo?’ Haha! Bitaw no? May punto!