DAGHANG mga lugar sa lalawi­gan sa Sugbo ang dunay dako nga potensyal sa ecotourism nga wa pa madiskobrihi o mahatagi og pag­tagad sa kagamhanan.

Apil na niini ang mga nindot nga suroyanan sa lungsod sa San Fernando, habagatang Sugbo.

Usa na diha, ang busay nga nahimutang sa Bugho, ang bukiran ug kinatumyan nga barangay sa lungsod nga duol sa utlanan sa Pinamungajan.

Ang busay wa pay opisyal nga pangan apan gitawag kini sa mga molupyo sa dapit nga Kawasan Falls.

Sa mga hilig og adventure, ang mga nindot nga porma ug dagkong mga bato paingon sa kinapusuran sa busay ang usa sa makadani. Ma­kadani usab ang bugnaw nga tubig sa falls.

Si Ian Bacalla, founder sa Bacalla Woods Campsite (BWC), niingon ang dagko nga mga bato nga mismo ang tubig ang nagpahimutang, haom alang sa slacklining.

Base sa website, thatslacklinegirl.com, ang slacklining, usa ka sport nga gipauso sa mga climber sa Yosemite Valley, California niadtong 1970’s ug 1980’s nga buhat sa pagbalanse sa paglakaw, paglingkod o pagtindog sa flat nylon webbing nga i-stretch ug ihigot tali sa duha ka mga kahoy, bato o gahi nga istruktura.

Matod niya mahimo usab ka mag­taod og duyan o hammock diin ang isig ka tumoy ihigot sa dagkong mga bato o punoan sa kahoy.

Ang patag nga may mga sagbot sa kilid sa falls nindot usab alang sa camping nga dunay camp fire sa gabii kauban ang imong pamilya o hinigugma.

Matod ni Bacalla nga sa pagpadung sa falls, mga 18 kilometros gikan sa South Poblacion, nindot usab alang sa mountain biking su­bay sa karsada o trekking agi sa mga bato ug kasagbutan.

Si Shielo May Duterte, artist ug usa sa guide sa BWC, namahayag nga dunay dako nga potential sa eco-tourism activities ang busay sa Barangay Bugho.

Kasagaran sa mga bisita nga nakaabot sa lugar, nipaambit niya, nga nakadayeg ug nakaingon sila nga na-relax ang ilang huna-huna gikan sa stress ug kadaghan sa mga trabahuonon ug naandam kini sa ilang pagbalik sa siyudad.

Suma pa niini daghang nindot nga mga suroyanan nga naglimin sa lungsod nga nagpaabot nga ma­diskobrihan sa mga tawo.

“Sa matag suroysuroy nimo sa ma­tag barangay, adunay daghang nin­dot nga gitagoan ang San Fernan­do nga potential for ecotourism. Ang nature di maoy moduol nimo, imo jud siya diskobrihon, imo siya adtuon,” si Duterte nagkanayon sa pakig­hinabi sa Superbalita Cebu.

Si Bacalla nidugang nga di lang ang paggiya ang gibuhat sa ilang grupo tungod kay nagtudlo usab sila sa kabataan ug sa mga bi­sita nga turista sa pagpangga ug pag-amuma sa kinaiyahan nga gi­pagamit sa Ginuo sa mga tawo.

“Kami, na-proud mi kay naa di­ay mi ani. Para makatabang mi sa among nahikatulog nga lungsod,” pamulong niini, kinsa lumad nga taga San Fernando.

Si Duterte, lumad usab sa lungsod, nihangyo sa mga tawo nga di dagmalan ug pasipad-an ang na­tural nga mga butang o mugna sa kinaiyahan nga makita sa palibot.

Alang sa mga interesado nga mobisita sa dapit, magmensahe lang sa Facebook account sa Bacalla Woods Campsite o sa Go San Fernando.