Duwa karon:
7:00 pm. - Ginebra vs.Meralco
SUGDAN na karong gabii sa crowd-drawer Barangay Ginebra ug sa first-timer sa finals Meralco Bolts ang ilang best-of-seven championship series sa PBA Governors Cup sa Araneta Coliseum.
Gipaabot nga hugopan ang Ginebra sa ilang mabagang dumadapig kinsa sulod na sa tulo ka tuig nga nagpaabot nga makataak og balik sa finals ang ilang paboritong team.
Kini maoy una usab nga higayon nga ang Bolts miabot usab sa finals sukad sa pagsulod niini sa PBA niadtong tuig 2010.
Apan alang kang Barangay Ginebra headcoach Tim Cone nga dili first-timer sa finals ang Bolts. Iyang gitumbok nga anaa sa Bolts ang numero unong utokan beterano nga player sa PBA nga si Jimmy Alapag ug ingon man ang usa sa mga multi-awarded coach nga si Norman Black.
“That’s not a first-timer,” pagbutyag ni Cone ngadto sa mga reporter human nila mapukan ang San Miguel Beer sa deciding Game 5 sa semifinals series.
Si Alapag kanhi sakop sa Katropang TNT ug nahimo usab nga team captain sa Gilas Pilipinas nga sa unang higayon sulod sa 40 ka tuig, ni-qualify sa Fiba World Championship.
“Norman Black is not a first-timer. It’s all about the leadership over there. They dominated Talk ‘N Text and it wasn’t that close,” matod ni Cone.
Gilakbitan usab ni Cone ang iyang kanhi assistant coach nga si Luigi Trillo nga karon mao na usab ang deputy ni coach Black sa Meralco.
“The organization may be new to the finals but he’s been there multiple times, Luigi Trillo is over there which is really a thorn in my side because he knows me well. He knows what I like to do and I had a lot of trouble with him when he took over Alaska. So I don’t see them as a novice group that everybody else does,” dugang ni Cone.
“And also, you got Jimmy there too. Obviously, Jimmy knows how to win, he knows how to make his teammates win and to me, they are the experienced group, not us.”
Kon tapo-tapuon, sila si Black, Trillo ug Alapag adunay 18 ka mga kampyonato. Gibutyag usab ni Cone nga kadaghan na sila mag-abot ni Black sa finals. Usa sa di niya hikalimtan mao kadtong tuig 1989 diin si Black naka-grand slam.
Hinuon basi sa statistic ni Fidel Mangonon, ang head statistician sa PBA, na wa pa gyud makadaog si Black ni Cone sa championship series.