GIPALAPDAN pa sa Taiheiyo Cement Philippines, Inc. (TCPI) ang mga kahimanan niini sa planta sa San Fernando pinaagi sa pagdugang sa ika-walo nga galingan aron matubag sa kompaniya ang nagkasakang demanda sa semento.
Misaksi ang mga opisyal sa kompaniya sa ground-breaking sa nahimutangan na ron niini sulod sa planta, uban sa mga opisyal sa Solid Earth Development Corporation (SEDC) ug mga kontraktor.
Misaka ang panginahanglan sa semento sa milabay nga lima ka tuig. Gisugnuran kini sa mikaylap nga pag-uswag sa pamatigayon sa yuta, sama sa mga nagkadaghang mga subdivision, mall, condominium ug hotel.
Ubay-ubay na sab ron ang mga pampublikong proyekto, ilabi na sa pagpalapad ug pagpasemento og mga karsada ug sa pagtukod og mga publikong kahimanan sa tibuók Kabisay-án, matod ni Sarah Y. Alvarez, tagduma sa TCPI Marketing Division.
Aron maabot ug matubag ang demanda, gisugyot sa mga nagdumala sa TCPI nga ipahimutang ang ika-walo nga cement mill system nga nahatagan og pagtugot sa Board of Directors nga mipuhunan og P663 milyones.
Gisagol ang clinker, kun purong semento, sa linaing mga materyales sulod sa finish mill aron mahimo ang piho nga tipo sa semento nga gikinahanglan sa pagpanukod, sama sa Portland, Pozzolan, Premium ug Masonry.
Gidesinyo sa Taiheiyo Engineering Corporation (TEC) sa Japan ang bag-ong galingan alang niining proyekto, dakong tubo ang tipo niini nga naggamit na sa bag-ong teknolohiya nga misagop sa slide-shoe support system nga makagaling og 128 tonelades matag oras.
Mga 4.2 metros ang gilapdon sa silindro niining galingan ug may gitas-on nga 18 metros. Mogamit kini og mga bolang puthaw nga may mga gidak-on nga 20-mm hangtod 90-mm, sumala ni Engr. Rolando G. Buhisan, hepe sa TCPI Engineering Division.
Gitukod na karon ang kahimanan sa Primary Structures, Inc. (PSI).
Miánhi gyud ang managing director sa TEC nga si Hiromi Fujimor uiban sa iyang grupo alang sa groundbreaking ug harun sab sa paghatag og teknikal nga paggiya sa mga enhinyero sa PSI.
Sa bulan sa Mayo, napahimutang na ang pinion gear, lakip na sa Y-rubber seal ug sa tabon sa girth gear ug sa istrakturang nagtukod niini.
Gikatakdang mahuman ug maggamit na unya ang galingan sa tapos sa Septiyembre karong tuiga. (PR)