SUBLI na sab nga nagkatapok ang mga dog lovers sa tinuig nga Dog Congress sa NCCC Hardwaremaxx.
Oktubre 1, gisaulog ang ika-walong tuig sa Dog Congress uban ang “Pinoy Fiesta” nga tema sa Kadayawan Hall sa NCCC Mall, Maa, dakbayan sa Davao nga gidagsa sa mga dog lovers bitbit sab ang ilang mga pets.
Ang usa ka adlaw nga kalihukan, nahimong mabulukon ug malampuson uban sa nagkadaiyang aktibidad ug kalihukan nga giandam.
Mga pinalanggang pets naka-avail sa free anti-rabies vaccination, check-up, grooming, lakip na pet blessing nga gipangunahan ni Reverend Father Bong Gonzaga sa St. Francis Xavier Parish.
Uban sa kalihukan, gihimo sab ang photo contest ug fashion show sa mga pet owners ug ilang pets nga gikalingaw sa kadaghanan.
Grand winner sa photo contest sila Paul Jason Secretaria ug pet niyang si Bolt Bailey, first runner-up si Ana Ma. Balani uban ang pet niyang si Koko, ug second runner-up si Daniel Thor with Hachiko.
Samtang sa fashion show, nanghakot og awards ang tandem nila Lourdes Barlis ug Pretty Meggy nga maoy mikampeyon. Luyo niini nakuha sab nila ang mga awards nga Best in National Costume, Crowds Favorites, ug Hardwaremaxx Choice Award.
First runner-up sab ang tandem nila Cris Sano ug Viis. Sila sab ang napiling Vet Partners’ Choice Award.
Second runner-up sab sila Mikel Tan ug pet niyang si Shi-shi. Nakuha sab nila ang Best in Casual.
Ubang winners mao ang mosunod: Best Team-up sila Hector Valle ug Kitkat, Most Shiny Hair sila Sherwin Desierto ug Snowy, Smallest Dog ang nakuha ni Loretta Chavez ug pet niyang si Empress, samtang Biggest Dog naangkon nila Hector Valle ug pet dog nilang si Kitkat.
Mga mananaug mipauling malipayon uban ang daghang freebies ug goodies.
Nagsilbing hurado sa kompetisyon gilangkuban nila Maria Sanchia De Asis, nanag-iya sa Petnannies Pet shop ug Philippine Pet Couture Association designer, ex-PBB Housemate Naphrey Almario nga mao say mananaug sa 2014 Dog Congress photo contest, Joel Bagas aka @LakwatserongPokemon (IG), photographer and lifestyle blogger, ug kining tigsuwat.
Sa pikas bahin, gikalipay sab sa mga suki sa NCCC ang pag-anunsiyo nga mamahimo ng mosuroy ang mga pet dogs and cats sa maong mall, sugod Oktubre 1.
Suma pa, ang pet pass makuha sa entrance kung buot sa mga pet owners nga ubanon sa ilang pag-malling ang ilang mga pinalanggang pets.