Pagpamomba sa Roxas sulbad na
TULO ka mga suspek sa pagpamomba sa Roxas night market kinsa mga miyembro sa Maute Group nga naka-base sa Cotabato City ug Maguindanao Province ang nadakpan sa mga awtoridad ug gipresenta sa publiko niadtong Biyernes, Oktubre 7.
Alas 4:20 sa hapon, gipresenta ang mga dinakpan sa GHQ Conference Room sa Camp Aguinaldo sa Quezon City nga naka-posas ug gi-iskortahan sa militar.
Mga suspek naila nga sila si TJ Tagadaya Macabalang, Wendel Apostol Facturan, ug Musalli Mustapha.
Gihulagway ni Department of National Defense (DND) Secretary Delfin Lorenzana nga mga suspek mga “students of Marwan,” nagtumbok kang kanhi Malaysian bomb maker Zulkilfi bin Hir kinsa maoy target sa kontrobersiyal nga operasyon sa pulis sa Mamasapano, Maguindanao niadtong Enero 2015.
Una niini si Lorenzana nagpresenta sa tulo pinaagi sa iyang gibasa nga unod sa imbestigasyon.
Ang opisyal nagbutyag nga dunay kinse ka plano ang grupo sa pagpamomba duha ka semana una pa man gibombahan ang Roxas night market niadtong Septyembre 2 nga nikalas og 15 ka mga kinabuhi ug gikaanggol sa 70 ka mga tawo.
“They have direct participation in the September 2 Davao night market bombing,” sulti ni Lorenzana.
Gipakita sab ni Lorenzana pinaagi sa usa ka video presentation ang kuha nga video sa mga suspek diin ilang giplano nga i-dokumento aron ipakita sa ilang grupo nga nagmalampuson ang ilang pagpabusikad.
Sa unang video, modagan kini og dul-an upat ka minutos nga gi-video sa usa sa mga suspek, diin makita ang pagbuto ug ang panag-istoryahanay.
“[Nag-ring ang phone], ‘Hello... paalis na kami Jem... Allahu Akbar!... (God is great!).’” tipik sa tingog nga madungog sa nag-video sa mitawag kaniya nga kaubanan sa grupo, 40 segundos human sa pagbuto.
Ika-duhang video, nakita ang usa ka kaubanan sa wala masayri nga lokasyon diin nagpakita nga sama sila sa Islamic State (Isis) ug ila kining gi-dokumento diin ang nakita nga lalaki sa video maoy usa sa mga nadakpan.
Si Lorenzana nagbutyag nga ang usa sa mga motibo sa pagpamomba mao ang padayong massive military operations sa gobyerno batok sa mga Abu Sayyaf Group (ASG) sa Sulu ug Maguindanao.
Ang tulo ka suspek nasikop sa usa ka checkpoint sa Cotabato City niadtong Oktubre 4, kinsa dunay relasyon sa Abu Sayyaf Group.
Sumala ni Lorenzana nga case-closed na ang maong kaso human positibong nailhan ug nasikop ang tulo sa siyam ka mga suspek.
“They are indeed the terrorists who bombed Davao City.... The Davao bombing case is closed,” panapos ni Lorenzana.
Mensahe sa mayor sa Davao
Gilayong nagpagawas og pamahayag si Davao City Mayor Sara Duterte-Carpio labot sa malampusong pagkasikop sa suspek.
Giingon sa mayor nga usa kini sa butang aron mahatagan og hustisya ang mga biktima kinsa nagdala pa sa trauma hangtud sa pagkakaron.
“This development is commendable as we vow to expeditiously give justice to the 15 victims who died and the 69 others who were wounded in the blast,” unang bahin sa pamahayag sa mayor.
Dugang sa mayor nga usa sa mga kinahanglan hinumdoman nga ang pagkasikop sa giingong mga suspek, usa ka butang sa paggiya sa pagbungkag sa teroristang grupo.
“It is, however, important for us to remember that the arrest must ultimately lead us to the dismantling of terror groups in our midst or result in the failure of more senseless acts of violence and extremism,” dugang sa mensahe.
Gisulti sab sa mayor nga di kini ang katapusan sa paghatag og hustisya sa mga biktima nga gibag-o ang kinabuhi gumikan sa ngilngig ug usa sa mga di malimtan nga panghitabo sa dakbayan.
“We also need to remember that this does not end our desire to give justice to the victims and those whose lives were forever changed by that horrendous act of terrorism on the night of September 2 in our beloved city,” sumpay sa pahayag sa mayor.
“Let us continue to be vigilant and show the world that we do not surrender to fear nor do we allow terrorism to cripple our humanity and undermine our values,” pagdasig sa mayor sa katawhang Dabawenyo.