BISAN tinuod natabunan ang balita nga mobalik sa telebisyon (ning tungora sa GMA 7 na) si Willie Revillame sa matawag tang eskandalosong balita mahitungod ni Melissa Mendez nga giingong nanagpa ug nagmugnag kagubot sulod sa usa ka eroplano sa niaging semana, inanay nang gihisgutan ang programa nga may ulohan nga Wowowin.
Kini tungod kay manghatag na usab og dagkong mga ganting salapi, balay, yuta ug uban pa si Willie. Tungod kay si Willie mismo ang prodyuser niini, siya ang nangunay pagtan-aw sa pagtukod sa iyang studio set.
Samtang kada Dominggo kini makita, nanghinaut si Willie nga mo-klik kini sa publiko aron iyang mahangyo ang mga bosing sa GMA 7 nga masalida kini kada adlaw.
Atong tan-awon kon sama ba gihapon kainit si Willie sa mga tumatan-aw ning iyang pagbalik.
***
Samtang giingong mopasaka og kaso sila si Andrew Wolfe ug Rey Pamaran nga mao kuno ang nakaaway ni Melissa Mendez sa eroplano, magpatabang usab sa grupo sa kababayen-an si Melissa aron mahatagan siyag hustisya.
Sa pagpakanaug ni Melissa sa eroplano, klarong naulawan kini ug gani nawad-an pa kuno kinig kahigayonan nga makakitag salapi adtong higayona.
Kinsa kanila ang nagtug-an sa tinuod? Kana ang atong tutokan ug kon kang kinsa mopabor ang ligid sa hustisya.
***
Kon si Coco Martin ang gitawag nga “Prince of Indie Movies,” angayan tingaling tawgon si Allen Dizon nga “King of Indie Movies.” Ning bag-o lang, nakadawat si Allen sa iyang ikatulong international best actor award tungod sa indie film nga “Magkakabaung” (The Coffin Maker) o tighimog lungon.
Didto kini sa 3rd Silk Road Film Festival sa Dublin, Ireland. Unang nadawat ni Allen ang duha ka best actor awards tungod sa maong pelikula sa 3rd “Hanoi” (Vietnam) ug 9th “Harlem” (New York) film festivals sa niaging tuig.
Nakadaug usab og best actor awards si Allen dinhi sa nasud sa mao gihapon papel sa Metro Manila New Wave Section sa Disyembre ug sa Gawad Tanglaw and Pasado Awards.
Samtang nilabang si Coco sa mainstream movies, padayon si Allen pagdominar sa indies. Gani bag-o lang usab niyang nadaug ang laing best actor award tungod sa indie film nga Imbisibol.
Sama ni Coco, unang nailhan si Allen sa mga seksi nga pelikula diin gipakita niya ang nindot pagkaporma niyang lawas. Di kahibudngan kon mosunod sa lakang ni Coco si Allen sa paglabang ngadto sa mainstream movies.
***
Nahisgutan na man gyud nato si Coco, moanhi na usab sa Cebu ang aktor kuyog si Toni Gonzaga karong Lunes, Marso 30. Kini aron pagpagarpar sa ilang bag-ong pelikula nga You’re My Boss nga ipasalida na sunod semana sugod sa Sabado Santo.
Magpasundayag si Coco ug Toni sa SM City Cebu Event Center sa Lunes sa hapon. Atangi.
***
Ang M-Talent Events & Promotions nga gidumala sa maanyag nga magpapatigayon (ug artista pod diay) nga si Aida Patana, motanyag sa The Power Trio Summer Concert Tour karong Dominggo, Mar. 29, didto sa Minglanilla Sports Complex.
Ang libreng pasundayag magsugod sa alas 7 s.g. Ang The Power Trio usa sa mga talents nga gihuptan sa M-Talent Events & Promotions nga gitawag nga “home of the stars.”
Gawas sa The Power Trio, mopasundayag usab ang kanhi PBB housemate nga si Manolo Pedrosa, ang komedyanteng si Ethel Booba, ang YouTube comedian nga si Chikita ug ang Glam Girls.
Ayaw sipyata.
***
Naiknat akong kilay sa pag-anunsyo ni Kris Aquino sa iyang programang Kris TV nga kauban niya sa summer special sa iyang programa ang “phenominal child superstar,” ang iyang ikaduhang anak nga si Bimby.
Phenomenal child superstar gyud? Tinuod siyay host ug prodyuser sa maong programa pero wa kana maghatag kaniyag katungod pagpalabi sa iyang gibati.
Kay unsa na ba god ang napakitang abilidad ni Bimby sa pag-arte aron kini matawag nga ‘phenominal child superstar?’ A, basta! Di ko palabot!