SOBRA tulo na ka bulan ang paglingkod ni Pangulong Rodrigo Duterte sa Malacanang. Nagkadaiya ang pamahayag sa katawhan kabahin sa iyang pagdumala sa unang 100 ka adlaw sa gahom.
Ang duha ka major survey institutions naghatag kaniya og hataas nga grado nga gani mas taas pa sa mga nilabay nga presidente gikan ni Cory hangtod sa iyang anak nga si PNoy.
Hasta ang duha ka chamber sa kongreso naghatag kaniya’g “A” nga grado sa kampanya batok sa ginadili nga druga samtang medyo nagkulang sa ubang programa sama sa pagsulbad sa grabeng trapiko sa Metro Manila.
Para kanako dako ang nakab-ot sa administrasyong DU30 ilabi na sa pagpabalik sa kompiyansa sa katawhan sa makinarya sa gobyerno sa pagsumpo sa krimen nga naglipang sa wa pa siya molingkod. Walay nituo, hasta si PRody nga dako kaayo ang problema sa droga sa Pilipinas.
Tiaw mong gibanabanaan nga 3.5-4.0 milyon ka Pinoy ang sabog ang utok ug ang kadaghanan pusher pa. Kung motuo kita sa sulti ni PRody nga ang tanang adik kay pusher pod, nan, dako ug bug-at gyud kaayo ang atong giatubang nga problema. Gikan sa iyang paglingkod, libuan sab ang nabugha, nadakpan ug ni-surrender.
Ang nangamatay kay nisukol sa pulis, ang uban gipatay sa ilang kauban ug ang uban kay gipatay sa mga riding-in-tandem. Ang isa ka kalainan sa administrayon karon mao ang kinaiya nga “aksyon agad”.
Mao gani nga nahimo nang nasudnong programa ang Central 911 Hotline Facility ug ang pagtukod sa 8888 Problem-Feedback Hotline nga gidumalahan sa DILG (Department of Interior and Local Government).
Libuan na ka problema og reklamo ang nadawat sa 911 ug 888 nga gisulayan ug tubag sa administrasyon sukad nga natukod kini.
Siyempre dili mawala ang prank calls ug kadtong gusto lang mosamok-samok sa administrasyon. Suko kaayo si PRody nga maglinya ang tawo sa opisina sa gobyerno ug unya-unyaon lang busa gipasidan-an niya nga putbulon sa trabaho kung di usbon ang sistema.
Wa puy puas ang iyang tirada sa gobyerno sa United States, European Union ug opisyales sa United Nations. Gusto gani niyang bugtuon ang hikot sa US kay nahimo na man hinuong makililimos ang Pilipinas ug bisan ang kapasidad sa militar wa gani molambo.
Matod pa sa iyang tigpamaba, daghang butang nga ipasalamat sa Pilipinas sa US apan dili kini dapat maoy modikta sa dalan nga iyang padulngan sama sa pakig-alyado sa China, Russia ug uban pang nasud nga makatabang sa Pilipinas sa negosyo, edukasyon, teknolohiya, kultura, ug armas.
Para kanako kini na tingali ang pinakaduol sa gipakigbisugan sa atong mga nationalists nga tinuod nga kaugalingnan sa nasud. Dugay na nga gigunitan kita sa kuko sa haring agila nga Ustados Unidos ug ang tanang mga presidente nga nilabay gigunitan sa ilang liog ug nahimo lang nga kiko-kiko, o “puppet” niini.
Sumala god kung dali ra ta makakuha’g US Visa? Daw iro ka nga magpakaluoy sa US Embassy ug maghulat kung kanus-a itsahan og bukog aron makasulod sa Amerika.
Hinuon, dili nato makalimtan ang ilang tabang ilabi na sa katalagman apan panahon na karon nga motindog kita sa atong kaugalingong tiil.