PANLANTAW sa garbo sa Pinoy Asia's first grand master (GM) Eugene Torre, kinsa nakakuha og men's open board 3 bronze medalya sa 42nd Chess Olympiad Baku 2016 sa Azerbaijan, moduwa sa chess exhibitions sa dakbayan sa Davao karung Oktubre 22 ug 23.
Usa sa sponsors nga si lawyer Jong Guevarra Jr., miingon niini sa iyang Facebook post niadtong Dominggo.
Siya miingon, "'Living legend' will be in the city on October 21 to 24 but only set two days for the simul games."
Si GM Torre mobisita sa dakbayan gikan sa iyang "super human performance" sa Baku diin miiskor og 10 puntos sa 11 rounds aron maka-bronze.
Ang Pinoy way pildi sa siyam ka duwa apan mitabla kang GMs Bernal Gonzalez (Costa Rica) ug Aryan Tari (Norway) sa boards 4 ug 6 sa maong han-ay.
Suma ni Guevarra nga si Torre dunay 10-board simul exhibition batok Davao City's top youth players sa Oktubre 22 sa Damosa, Lanang ug laing 10-board simul exhibition kontra Davao executives sa Oktubre 23 didto sa Jardin del Roca Resort sa Eden, Toril.
Ang rehistrasyon nagkantidad og P1,000 matag duwa nga first-come, first-served basis complete nga dunay certification ug laing memorabilia.
Ang matigom sa maong event ihatag kang GM Torre aron suporta sa iyang kampanya sa World Seniors Chess Championships sa Nobyembre 18 hangtod Disyembre 1 sa Czech Republic.
Ang pagbisita ni Torre gipaluyohan nila Guevarra Jr., Glen Paclar, national master Jonathan Tan, Engineer Allan Diez, ug Cris Yap.