VILLABA, Leyte - Usa ka mananagat nga giingong ig-agaw ni anhing Central Visayas drug lord Jeffrey ‘Jaguar’ Diaz ang nadakpan sa buy-bust operation kagahapon sa buntag.
Giila ang dinakpan nga si Nestor Diaz, 53, taga Barangay Tagbubunga sa naasoyng lungsod.
Matod ni P/SInsp. James Gervacio, hepe sa Villaba PNP, mitahan na pagsugod sa Oplan Tokhang ang suspek nga gitumbok niyang ig-agaw ni Jaguar apan wa kini makapirma og certificate of undertaking.
Dugang ni Gervacio, base sa ilang pag-monitor, mibalik gihapon sa iyang ilegal nga kalihukan ang suspek.
Alas 8:00 pasado gahapon sa buntag gilusad ang buy bust operation batok sa suspek.
Nasakmit sa kapulisan ang unom ka pakite sa gituhoang shabu ug marked money.
Gihimakak sa suspek ang pasangil kay dugay na siya miundang ug wa usab siya moangkon nga ig-agaw sila ni Jaguar.
Dugang ni Gervacio, duna pa gihapoy mga newly identified nga pusher sa nga misulbong kay magsalig nga wala sa watchlist.