ORMOC CITY, Leyte - Kagawad sa usa ka barangay sa dakbayan sa Ormoc ang gipusil patay sud sa iyang balay sa miaging gabii.
Giila ang biktima nga si Ramil Daffon, 44, kagawad sa barangay District 1.
Nasayran nga si Daffon naghigda sa ilang sala uban sa iyang asawa samtang nag tan-aw sa telebisyon.
Alas 6:00 pasado sa gabii, dunay tulo ka tawo nga nagsakay og motorsiklo nga nagpaniid sa balay ni Daffon.
Ang balay sa biktima naa daplin sa karsada diin sayun ra sudlon.
Nakabantay ang mga suspek nga nalingaw pagtan-aw sa telebisyon ang biktima busa gisud na kini sa tulo ka responsable.
Gipusil ang biktima sa makadaghang higayon diin pulos dughan ang igo ug base sa inisyal nga imbestigasyon nakaangkon og siyam ka samad pinusilan ang biktima.
Nagtuo ang asawa sa biktima nga ang suga nila ang mibuto apan iya nalang nakit-an iyang bana nga naligo na sa dugo.
Giingong mi-surrender na si Daffon pagsugod sa Oplan Tokhang.
Hayun ra nga milakaw ang tulo human sa hitabo nga pulos lang nagkalo.
Gisuwayan pagsalbar sa Ormoc City rescue si Daffon apan patay na kini.
Sa miaging Sabado sa gabii, gipusil usab sa riding in tandem sa Barangay Alegria ang usa ka Jaymund Peñalosa taga Barangay Punta.
Matod ni PO3 Warlito Tingal, dunay gipalit sa usa ka tindahan ang biktima ug asawa niini sa dihang gisugat kini sa riding in tandem ug gipamusil.
Midagan pabalik sa agi ang biktima aron mangayog tabang apan gisundan gihapon og pamusil.
Misibat padung sa city proper ang responsable samtang gidala sa usa ka tambalanan ang biktima kinsa kritikal pa ang kahimtang.
Si Tingal niingon nga posibleng may kalabutan sa ilegal nga drugas ang motibo sa krimen.