DUNGAN sa ika-40 ka adlaw sa Roxas night market bombing, gipakita sab sa publiko ang memorial marker sa lugar asa nahitabo ang pagbusikad.
Mismong si Davao City Mayor Sara Duterte Carpio ang nanguna sa unveiling sa marker nga gisaksihan sa pipila ka opisyales sa dakbayan, otoridad, biktima ug kabanay sa mga namatay sa Roxas bombing, lakip na mga Dabawenyo.
Ang marker gilangkuban sa mga buwak nga nagsimbolo sa kinabuhi.
Alang ni Davao City Archbishop Romulo Valles, nga nanguna sa misa, ang marker nagpasabot sa kinabuhi ug paglaum.
Gidayeg sab niya ang inisyatibo sa lokal nga gobyerno labot niini.
Makita sab sa marker ang ngalan sa kinse ka biktima sa pagpamomba.
Nauna nang gibutyag sa mayor: “We commit to forever remember the victims of the bombing on September 2. And we also commit to do everything possible to prevent or stop acts of terrorism from happening again.”
Dugang sa mayora nga ang memorial magsilbi nga lugar alang “for prayer, for peace, and remembrance.”