“INOSENTE gyud ko ana intawon.”
Kini ang gibarogan ni Ronda Vice Mayor Jonah John Ungab human gikasohan sa kapulisan sa lungsod sa Albuera, Leyte nga giingong usa sa mga protektor sa illegal drug trade sa drug lord nga si Rolan “Kerwin” Espinosa.
Gawas sa bise mayor, apil sa gipasakaan og reklamo nga kalapasan sa Republic Act 9165 kun Dangerous Drugs Act sa Department of Justice sila si Senador Leila de Lima; Albuera, Leyte Barangay Binulho Konsehal Nelson Pepito; Wennie Codilla, negosyante sa Ormoc City; Victor Espina sa Ormoc City, Joseph Nuñez, retirado nga jail warden sa Altavista, Ormoc City; ug tulo ka mga tigbalita nga nagbase sa Ormoc nga sila si Lalaine Marcos Jimenea, John Pilapil ug Leo Dumon.
Mismo si P/Chief Insp. Jovie Espenido, hepe sa Albuera Police Station, ang mipasaka og reklamo.
Si Pilapil, news stringer sa CNN Philippines, blocktimer sa dyAJ Power 90.3 FM ug correspondent sa Superbalita Cebu, niklaro nga wa siya magdawatan og drug money gikan ni Kerwin ug dili usab siya protektor niini.
Si Ungab, niklaro nga ang iyang koneksyon ni Kerwin isip usa lang ka manlalaban sa mga kasong kriminal nga giatubang niini may kalambigitan sa ginadili nga drugas sugod niadtong 2008.
Niadtong Enero 2015, siya usab ang gikuha nga abogado ni Kerwin alang sa pagpawalay bili sa kasal niini sa kanhi asawa nga si Annalou Llaguno, 30, kinsa napatay sayo ning buwana sa dakbayan sa Sugbo.
Ang 42-anyos nga bise mayor, wala pa makadawat og kopya sa complaint affidavit, nibutyag nga ang kasong kalapasan sa Comelec gun ban sa Cebu City Regional Trial Court Branch 23 niadtong 2012 ang wala pa mapakanaog ang resolution.
Niadtong 2015, si Ungab nagsilbi nga legal consultant dihang ang amahan ni Kerwin nga si Rolando Espinosa Sr. miduso sa iyang certificate of candidacy pagka mayor sa Albuera sa miaging piniliay niadtong Mayo, sanglit way kontra ang bise mayor sa iyang pagpapili sa Ronda.
Si Ungab usab ang nitabang ni Rolando Sr. nga masakop sa United Nationalist Alliance (UNA) diin nanumpa kini atubangan ni kanhi Cebu City Mayor Mike Rama, coordinator sa partido sa Sugbo.
Si Ungab nidaog pagka bise mayor samtang si Rolando Sr. pagka mayor sa Albuera.
Si Ungab,nagtuo nga ang mga tseke nga nakapangan niini ug nakuha gikan sa balay sa mga Espinosa dihang gironda sa kapulisan, ang hayan usa sa gibasehan nga apil siya sa gikasohan.
“Basically and professionally, ang akong connection ni Kerwin ang akong service as a lawyer lang niya,” pagtino sa bise mayor.
“Unsa may akong ika-protect niya nga wa man koy influence didto,” dugang niini.
Siya nabalaka sa iyang seguridad ug sa iyang pamilya labi pa sa iyang unom ka mga anak.
Si Pilapil nagtuo ang iyang pag-handle sa block time programa sa mga Espinosa ug ang pagpagawas og report niini pabor sa kandidatura sa mayor ang gihimo nga basehanan nga siya gilambigit nga protektor.
“Kon nahibawo pako di nako isakripisyo ang akong inampingan nga pangan sa media,” padayag ni Pilapil, kinsa gisuspenso sa dyAJ ug gi-terminate usab ang kontrata niini sa CNN.