NAMATAY ang duha sa siyam ka mga construction worker sa nahugno nga paril sa lungsod sa Liloan sa usa ka pribado nga ospital.
Si Lazaro Capa Jr. ug Bongo Cuba namatay sa Mendero Medical Center sa Barangay Pitogo, Consolacion, gumikan sa kadaot nga nahiagoman sa ilang ulo.
Human sa hitabo niadtong Biyernes sa hapon, si Liloan Mayor Christina Garcia-Frasco niisyu og stoppage order batok sa padayon nga pagtukod sa Citi Hardware building sa Barangay Cotcot.
“The LGU is currently conducting a thorough investigation on this matter with all parties involved, including the contractor and its principal. A stoppage order has been issued for the contractor to cease and desist from construction pending investigation,” si Frasco nagkanayon sa text message.
Siyam ka mga construction worker ang dali nga gidala sa tambalanan human ang pader nga ilang gitukod nahugno ug nitabon nila.
Ang kapulisan sa lungsod nagtuo nga nihumok ang pundasyon sa paril gumikan sa sige og uwan.
Si Capa namatay alas 4 sa hapon niadtong Biyernes samtang si Cuba namatay alas 4 sa hapon kagahapon, matod sa manghod nga babaye nga si Genalin Frias, dihang nahinabi sa Sun.Star Cebu.
Matod ni Frias, si Cuba, na-comatose, diin dunay blood clot ang nakit-an sa utok niini base sa resulta sa CT Scan.
Si Cuba mobalik unta sa iyang kanhi kompaniya nga gialagaran sa sunod buwan.
Si Cuba, dugang ni Frias, niundang og trabaho sa kanhi kompaniya human ang asawa niini na-admit sa ospital niadtong Agusto.
Niadtong Oktubre 4, si Cuba nanawag pa ni Frias ug malipayon nga nipahibawo nga gitawagan kini sa kanhi kompaniya kay patrabahuon og balik.
“Nagkinantahanay pa mi atong pagpista sa Maslog, Danao City,” dugang ni Frias.
Dihang si Frias nagpahibawo sa contractor nga namatay ang iyang igsuon, igo lang siya giingnan nga mohatag kini og P120,000.
Siya nipasabot nga dili paigo ang mao nga kantidad sa gastuanan sa pagpalubong ug sa gikinahanglan sa pamilya sa iyang igsuon tungod kay upat ang mga anak niini nga nagpanuigon og 20, 16, 9 (pulos lalake) ug 12-anyos nga babaye.
Gusto ni Frias nga makig-estorya sa pamilya ang contractor ug mangutana kon unsa ang mga panginahanglanon niini.
Ang Department of Labor and Employment motabang nila sa nahitabo sa iyang igsuon.
Matod sa kasayoran sa pulis nga gihatag sa nurse-on-duty sa MMC, si Lowel Batican naa pa sa intensive care unit, si Joel Procurato, naa sa out-patient department samtang way record kon na-admit o wala si Antonio Cueza.
Ang laing mga trabahante nga sila si Alex Rosal, Melvin Procurato, Rene Barrido ug Condito Baculao gipailawom og surgery.
Si Frasco nidugang ang Municipal Engineering Office naghimo og imbestigasyon sa hitabo ug way gitugot nga konstruksyon samtang wala pa mahuman ang pakisusi.
Si Police Chief Insp. Franco Rudolf Oriol, hepe sa Liloan Police Station, niingon nga ang construction ubos sa contractor ug sub-contractor.