"MIANHI ako aron makabaton kamo og kinabuhi ug kinabuhing madagayaon," Juan 10:10.
Dili gyud masipyat sa hunahuna sa tawo ang paghisgot sa problema tungod sa ginadiling druga nga miabot na ngadto sa maong ang-ang sa kalamidad ug hinanaling sitwasiyon nga nakagamot diha sa tumang kapit-os, kasingkasing nga samaran, kahakog ug pag-abuso sa gahum.
Ang isyu sa druga wala lamang naghisgot mahitungod sa indibiduwal users ug pushers kon dili ngadto sab sa mga pamilya ug katilingban nga naapektohan og maayo niining pakigbugno batok sa druga nga mitabok sa tanang suok sa komunidad gikan sa kapobrehon ngadto sa pagkahamugaway ug pagkaharianon.
Risgo ug mas kuyaw ang kahimtang karon sa mga liboan ka mga ni surrender, giaresto ug gibalhog sa bilangoan tungod kay halos ang prisohan wala nay lugar kabutangan alang kanila.
Kadaghanan ra ba nila mga binunyagan sa Katoliko ug mga tawo nga dunay pagtoo ug relihiyusong grupo diin nagaantus sa tumang kalisud diha sa aspeto sa moral, sikolohikal, espirituwal ug pinansiyal nga kinabuhi.
Tungod niini, padayon gihapon kitang mobarog alang sa pagrespeto ug paghatag og bili alang sa kasagrado ug may dignidad nga kinabuhi sa tawo.
Sa kanunay kita dakong supak niining mga sunod-sunod nga pagpatay aron lamang matubag ang suliran sa isyu sa druga.
Busa dili nato masulbad ang maong krimen pinaagi sab sa paghimo og krimen.
"Ako ang Ginoo, ang Diyos nga maluluy-on. Dili Ako daling masuko ug hupong sa gugmang walay paglubad ug matinumanon. Nagatuman ako sa Akong saad ngadto sa linibo ka kaliwatan ug magpasaylo sa mga sala, apan silotan ko gayud ang mga anak ug mga apo hangtud sa ikatulo ug ikaupat nga kaliwatan tungod sa sala sa ilang katigulangan," Exodo 34:6-7.
Matud pa ni Pope Francis nga mao ni ang pinakamaayong higayon para sa tibuok simbahan nga mangayo'g kusog gikan sa gugma ug kalooy sa Ginoo. Mao ni ang panahon sa paghatag og importansiya diha sa kinabuhi sa simbahan dinhi sa atong nasud.
Giawhag sa atong Santo Papa nga mao na ni ang hustong panahon nga kita isip tawo mamalandong ug maghimo sa gitawag og "circles of discernment" para ang ikaw ug ako makagahin og panahon alang sa pagbalik lantaw, makadesisyon ug makaampo alang sa unsay tinuod nga kamatuoran.
Ang matag lalaki ug babaye gilalang sa Diyos isip bililhong huyop sa kinabuhi.
"Gibuhat sa Ginoo ang tawo, gihuypan Niya ang buho sa ilong sa tawo sa makapabuhing gininhawa ug ang tawo nakabaton ug kinabuhi," Genesis 2:7.
Ang kinabuhi sa tawo balaan tungod kay gasa kini sa kahitas-an. Busa walay luna ang balaod sa pagsilot sa tawo ngadto sa kamatayon bisan ang matag sugo sa pagbitay nagsalikway ug nagpasipala sa desinyo sa Ginoo.
Tungod sa bililhong dignidad sa tawo ang silot sa kamatayon dili makiangayon sa mga mata sa Diyos ug sa tawo.
Ang atong pagsabot sa ka bilihon sa tawo nagalambo ug nagkalawom pinaagi sa atong mga taras ug kinaiya subay sa pagkadagway ug kasamahan sa atong Magbubuhat.
Ang atong pagkaamgo sa mga moral nga katungdanan nagalambo usab gumikan sa kanunay nga pagtuon na may kalabot sa kahimtang ug padulngan sa tawo ug pinaagi sa mga pagtulun-an gikan sa psychology.
Apan daghan gihapon karon nagpangutana sa panginahanglan sa silot kamatayon.
Ang atong Presidente usa niini ang interesado nga banhawon ang silot kamatayon. Pero mao ba ni ang tubag sa hagit sa atong panahon karon?
Gihagit kita sa pagbasa ug pagsabot sa mga hagit sa panahon, (Mateo 16:3).
Sayron nato sa panahon pa sa atong Konstitusyon 1935 ug gani hangtud karon, ang balaod kanunay naghisgot og "cruel and unusual punishment" apan gumikan sa atong moral nga pagsabot niini nga ang silot sa kamatayon dili ug walay labot niining giingon sa balaod.
Wala ni magpasabot nga ang tawo luwas niining maong mga silot "cruel punishments" apan dili unta mosangko ngadto sa iyang pagkutlo sa kinabuhi.
Ang Katolikong simbahan pinaagi sa mga pagpanudlo sa Santo Pope John Paul II sa iyang Evangelium vitae nga naghisgot sa paghatag og bili, respeto sa kinabuhi sa tawo.
"Cases warranting the death penalty now are 'very rare if not practically nonexistent'," (Evangelium Vitae, no. 56).
Bugtong timaan sa paglaum mao kining pagsaka sa gidaghanon sa mga tawo nga maamguhong nagtamod ug naghatag bili sa kada dignidad sa kinabuhi nga kini dili mahimong malimtan ni masalikway bisan pa man kini nakabuhat og dagkong krimen.
"I renew the appeal I made most for a consensus to end the death penalty, which is both cruel and unnecessary," matud pa ni Pope John Paul II.
Si Pope Francis, uban sa mga Obispo sa tibuok kalibutan, nagpadayag nga ang simbahan mahugtanong nagsalikway sa silot kamatayon.
"The Church firmly rejects the death penalty," (see Amoris Laetitia, no. 83). Kay ang silot sa kamatayon kanunay nagasupak ug nagasalikway sa kabalaan sa kinabuhi ug sa dignidad sa matag tawo.
Kini sab nga silot nakadaut ug nakaguba sa kinatibuk-ang plano sa Ginoo alang sa kada usa ug sa katilingban ug labaw sa tanan nakalapas sa katungod sa Diyosnong kalooy ug hustisya.
Panahon na nga magkat-on kita sa atong kaugalingon ug molaylo sa mga hunahuna ug baruganan nga kung ang tawo makabuhat og dagkong krimen kinahanglan dayon ang paghunos sa kinabuhi.
Atong timan-an pag-ayo nga walay bisan usa kanato ni ang Estado nga gihatagan og katungod sa paghunos sa kinabuhi sa tawo.
Ang legal nga obligasyon nga nahipatik sa balaod sa nasud sa Pilipinas mao nga ang silot sa kamatayon dili banhawon.
Sa Covenant on Civil and Political rights naghisgot nga ang matag estado partido kinahanglan nga mohimo og mga maayong lakang aron malikayan ang pagsilot sa kamatayon diha sa iyang hurisdiksiyon.
Ug wala gyud gihisgutan sa maong panawagan nga tugutan ang atong nasud sa Pilipinas nga isalikway ug ibandona ang gitawag og "international law and agreement".
Nagtuo ko nga ang pagwagtang ug pagbasura sa silot sa kamatayon makatabang sa pagpalambo sa dignidad sa tawo ug pagpalapnag sa tawhanong katungod.
Mao ni ang panawagan sa matag estado nga unta ibasura ang "death penalty" ug dili na hisgutan.
Ang atong lig-on nga baruganan batok niining pagbalik sa silot sa kamatayon nagaagad ug nagsumikad dili lang sa pagrespeto sa dignidad sa kinabuhi sa tawo kon dili sa mga legal nga sukaranan sa atong piniling nasud.
Republic Act 9346, the act repealing the death penalty and granting universal commutation to life imprisonment and reclusion-perpetua. (Feedback- 09487549768)