GIPAABOT ni Regional Director Marcial Labininay sa Philippine Institute of Volcanology and Seismology (Phivolcs) nga angayan gayud mangandam ang katawhan lakip ang kagamhanang lokal sa Northern Mindanao.
Kini human nasinati sa rehiyon ang pagtay-og niadtong Sabado, Oktubre 15, sa kadlawon diin ang dakbayan nakasinati og Intensity II sa linog.
Matod ni Labininay nga adunay mga fault line sa rehiyon nga angayan nga bantayan sama sa fault line diha sa dakbayan sa Gingoog paingon sa probinsya sa Bukidnon.
Aduna usab bag-ong nadiskubre nga fault diha sa lungsod sa Balingasag paingon sa Malitbog ug aktibo usab ang fault sa Tagoloan River ug Lanao River.
Matod ni Labininay nga kinahanglan gayud kini pangandaman sa kagamhanan tungod kay dili kini matagna kung mahitabo ang linog ug unsa ka dako ang kadaot nga hatod niini.
Dugang niini nga mas kinahanglan nga pangandaman nga walay kaswalidad taliwala unsa nga magnitude ang masinati.
Mas gikinahanglan sa katawhan ang ma-edukar kung unsaon pagsalbar sa kaugalingon panahon masinati kini nga klase nga kalamidad.
Niadtong Sabado sa kadlawon nabati sa taga Cagayan de Oro ang pagtay-og ug kini anaa sa Intensity II.
Intensity V ang Butuan City, Nasipit, ug Carmen, Agusan Del Norte, Intensity IV ang Remedios Romualdez ug Magallanes sa Agusan Del Norte, Intensity III sa Surigao City, Gingoog City, Misamis Oriental ug Mambajao, Camiguin.