Samuel P. Rusiana
Bato, Samboan, Cebu
SI ERNESTO usa ka lider sa sindikato nga tigpayuhot og armas, drugas ug uban pa. Usa siya ka drug lord ug smuggler nga taga Mindanao. Ang iyang sekretong mga kontrabando gitaguan sa usa ka isla sa Palawan. Lisod siya nga madakpan kay apil sa iyang payroll ang hiwi nga sakop sa militar ug kapulisan. Suod niya ang ubang pulitiko kay panahon sa eleksiyon mohatag siya og pinansyal nga hinabang. Gibuhat niya kini aron ma-protehian ang iyang ilegal nga negusyo.
Usa ka adlaw, si Jerry nga estambay sa merkado sa Zamboanga City mi-aplay og trabaho.
“Sir, mo-aplay ko bisan kargador. Nagkinahanglan kuno mo og trabahante,” matod ni Jerry ngadto sa sinaligan sa tag-iya, si Bobby.
“Balik sa Lunes sa buntag,” ni Bobby human sa interbyu kang Jerry.
Nadawat sa trabaho si Jerry ug gidala sa usa ka bodega nga nahimutang sa hilit nga lugar. Panahon sa kagabhion magkarga silag sinakong bugas. Nahibulong si Jerry nga lainlaing sakyanan ang mosulod ug mogawas sa compound.
Milabay ang usa ka tuig. Usa ka adlaw gipauban si Jerry ni Bobby sa usa ka isla kay adunay importanting trabahuon. Tungod kay buotan ug kugihan misalig kaniya si Bobby. Gipaila niya si Jerry kang Ernesto.
“Sir, may koordinasyon na mi nga gihimo. Plantsado na ang tanan,” pahibalo ni Bobby kang Ernesto.
“Sa Biyernes Santo sa gabii kinahanglan nga madawat na sa buyer kining mga armas.” ni Ernesto nga mi-inspeksyon sa nagkalainlaing kalibre sa armas nga gikarga sa speed boat.
Samtang naglawig sila si Jerry panahon sa kagabhion may patrol boat sa Coast Guard nga ilang nalantawan sa halayo. Mitago ang ilang gisakyan nga speed boat sa katunggan aron dili mahimatikdan. Human nakalabay ang nag-patrolya mipadayon sila paglawig. Kaadlawon na silang miabot sa ilang destinasyon.
Human ma-deliber ang mga armas nagpasalamat si Ernesto sa iyang mga sakop. Naghudyaka silang nag-inom dihang nakabalik sa isla.
BISPERAS sa Bag-ong Tuig milarga si Bobby ug mga kauban aron mo-deliber og usa ka sakong shabu sa Cebu. Gisagol kini sa sinakong humay aron dili mahimatikdan sa mga awtoridad. Samtang naglawig ang lantsa nga ilang gisakyan gipahunong sila sa nagpatrolya nga maritime police sakay sa ilang speed boat. Wala sila mohunong ug nahitabo ang pinusilay. Namatay si Bobby human maigo sa dughan.
Tungod kay wala na si Bobby, si Jerry ang gihimong sinaligan ni Ernesto. Gitug-anan siya ni Ernesto bahin sa pamaagi sa sindikato. Gipakita si Jerry sa laboratory sa shabu sulod sa langob nga may sekretong agianan ug pinili lang ang makasulod.
Nanglabay pa ang mga bulan. Sa adlaw sa kalag-kalag nananghid si Jerry kang Ernesto.
“Bossing, mobisita ko sa lubnganan sa akong ginikanan. Dugay na ko nga wa makaduaws sukad mitrabaho dinhi,” hangyo ni Jerry.
“Okey lang, pero ayaw pagdugay,” ni Ernesto.
Paglabay sa tulo ka adlaw, Gironda sa mga sundalo ang isla, Nasikop si Ernesto ug ang iyang mga sakop. Nasakmit ang nagkalainlaing kalibre sa armas, ginadiling drugas ug ubang ko ntrabando nga nakuha sa mga sundalo. Nadiskubrihan sa militar ang nahimutangan sa laboratoryo sa shabu. Gihakot sa mga sundalo ug gikarga sa barko sa navy ang tanang kontrabando, ug kemikal nga gigamit sa paghimo og shabu.
“Sir, mission accomplished!” ni Jerry nga mi-report ug misaludo sa iyang boss.
“Job well done. Congratulation, Lieut. Dela Cruz!” matod ni Major Omay nga maoy naghatag og misyon kang Jerry, nga usa ka intelligence officer nga gitahasan pagbungkag sa sindikato. (Katapusan)