NAGLISOD karon ang Commission on Human Rights (CHR 7) pagpahigayon og imbestigasyon kabahin niining extra judicial killings (EJK) dinhi sa rehiyon gumikan kay walay mga saksi ang maong mga krimen. Ug kon aduna may mga saksi, nangahadlok usab kining motestigo. Mao kini ang gibutyag ni CHR 7 chief investigator Leo Villarino. Matod pa ni Villarino nga sa 20 kapin ka mga kaso nga ilang unta nga paga-imbestigahan, pipila ra niini ang adunay kalambuan. Kini gumikan kay nangatras ang mga saksi ning maong mga kaso gumikan sa kahadlok.
Aw, mao gyud ang dangatan niining maong mga kaso. Walay kaso kon walay saksi. Unsa-on man pagbarug sa maong mga kaso ngadto sa piskal o labi pa ngadto sa korte kon walay mobarog nga saksi. Huyang ang kaso ug dako ang posibilidad nga ma-dismiss lamang kini. Kining mga pagpatay nga may kalambigitan sa illegal nga drugas nga gi-classify isip extra judicial killings mao kadtong mga pagpatay nga wala ma-ilhi ang mga mamumuno. Giingon lang nga vigilantes o hired killer nga gibayran sa mga druglord ang ningpatay sa mga drug pushers nga wala moremit sa ilang halin sa drugas ngadto sa ilang gikuhaan.
Matod ni Villarino nga mas sayon pa imbestigahon ang pagpamatay nga binuhatan sa mga pulis atol sa legitimate operation kay klaro nga adunay subject sa imbestigasyon kay nailhan man ang mga responsable. Gani aduna na may mga pulis nga nakiha gumikan kay matod pa miabuso naman sa ilang katungdanan sa pagpusil na lang sa usa ka gidudahan nga drug personality. Aw, kining kaso nga walay mabarug nga saksi, mahulog sa thank you.
Nag-unay?
Daghang mga misteryo ug mga tanghaga nga naglimen niining pagpatay kang Annalou Llaguno, kanhi asawa ni Kerwin Espinosa, ang suspected drug lord nga nag-operate sa Eastern Visayas. Kasado diay si Kerwin ug Annalou kay aduna man silay pending annulment case didto sa korte sa Ormoc City. Si Annalou gipusil patay niadtong Septiyembre 30 sa tulo ka mga tawo nga nagsakay og motorsiklo sa Duljo Fatima. Ang duha sa tulo ka mga suspek, matod pa, gipamatay na usab karong bag-o sa wala ma-ilhing mga mamumuno.
Kinsa man ang nagpaluyo kaha sa kamatayon ni Annalou? Ug si kinsa man usab kaha ang nagpapatay niadtong mga mipatay kaniya? Sa pagbuwag nila ni Kerwin ug Annalou, matod pa, na-uyab usab ni Jeffrey “Jaguar” Diaz, laing bigtime druglord si Annalou. Patay na si Jaguar. Unya si Annalou, pag-umangkon sa laing druglord kaniadto nga si Crisostomo Llaguno alyas Tata Negro. Puro druglord no? May kalambigitan kaha sa drugas ang pagpatay kang Annalou? Nag-unay kaha ni sila? Intrisado kaha moimbestigar ang kapulisan aning maong mga kaso? Tanghaga gyud. (bobby@sunstar.com.ph)