KAMPANYA batok gidiling drugas sa dakbayan sa Mandaue gipunduhan sa 2017 budget nga gisumiter ni Mayor Luigi Quisumbing ngadto sa konseho sa dakbayan.
Mokabat ngadto sa P10 milyones ang gi-alokar ni Quisumbing alang sa kampnaya batok drugas lakip na ang mga aktibidad ubos sa account of maintenance and other operating expenses niini.
Sa iyang duha ka pahina nga budget message niadtong Oktubre 14 sa Sangguniang Panlungsod, giduso ni Quisumbing ang P2.395 bilyones nga 2017 budget, diin ang P140.695 milyones niini alang sa development projects nga maoy 20 porsyento sa City’s Internal Revenue Allotment.
“Full provisions are made for all statutory and contractual obligations. Like 20 percent development fund, employee benefits, aid to component barangays, loan amortization, maintenance of city roads and bridges, anti-drug campaign are allotted a fair share of the budget,” matod ni Quisumbing sa iyang budget message.
Base sa kanhi record sa city budget office, way gi-alokar nga pundo si kanhi mayor Jonas Cortes alang sa calendar year 2015 ug 2016 alang sa pagpalambo sa kampanya batok drugas.
Base sa mandato sa Republic Act 9165 (Dangerous Drug Act of 2002) nga ang matag local government unit gikinahanglan nga moalokar og pundo alang sa anti-drug use nga programa niini.
Sumala pa sa section 1 sa balaudnon nga ang LGU kinahanglang motabang sa pagsumpo sa iligal nga drugas pinaagi sa pagpondo sa pagsumpo, pag-edukar, rehabilitasyon o pagpaayo sa mga nagumon sa drugas.
Gikalipay usab ni Bise Mayor Calo Fortuna, presiding officer sa konseho, ang desisyon sa mayor sa pag-alokar ug pondo alang sa maong programa.
Usa ka community-based nga programa ang gidesinyo sa dakbayan alang sa pagtabang sa pagpaayo sa drug dependents niini diin ang mga nitahan ipaubos ug counseling sa ilang mga kominidad.
Di mominos sa 1,467 ka mga drug users ang boluntaryong nitahan na sa dakbayan sa Mandaue sukad gipatuman ang Oplan Tokhang niadtong Hulyo.