MASULAYAN sa Cagayan de Oro National High School o City High ang asido sa Sacred Heart of Jesus Montessori High School sa pag-agbat nila sa 2016 Cagayan de Oro Basketball Federation secondary boys finals karong Sabado, Oktubre 29, didto sa Mindanao University of Science and Techonology Gym.
Ang City High mao lang nga team sa eskwelahang pampubliko nga niabot sa finals.
Ilang awhagon ang ilang bitoong player nga sila Joemarie dela Piedra ug Dave Renz Balo, kinsa parehas nanganlan sa Mythical Five sa bago nahuman nga Third Oro Speed Inter-Public School Basketball League.
Apan, dili sab magpalupig ang mas paborito nga Sacred Heart of Jesus Montessori High School ni coach Boy Dacoco.
Usa sa pinaka beteranong coach sa dakbayan si Dacoco ug dali ra siya maka-adyas sa unsa man nga transisyon sa dula.
Nagpahayag si Raul Fuentes, ang tournament director sa Oro Speed, nga dili magkumpyansa ang Sacred Heart kay naay nagpalikod nga coach sa City High.
“Hilom kaayo ang coach nagpaluyo sa City High nga dili gusto magpaila,” ingon ni Fuentes.
Sugdan ang ilang finals sa City High ug Sacred Heart sa alas-10 sa buntag human sa away sa ika-tulo nga pwesto tali sa Southern de Oro Philippines College junior Sharks ug Xavier University High School junior Crusaders sa alas-8 sa buntag.