NAGKADAIYANG tanom, kahoy, mga buwak ug orchids. Pipila lang kini sa mga maanindot nga talan-awon nga inyong makita sa Botanic Garden sa nasud sa Singapore.
Ang harden maoy una sa Asya ug bugtong botanical garden nga nalakip sa UNESCO Wolrd Heritage List.
Kini maoy usa sa mga gidagsa nga atraksyon sa nasud ilabi na adtong mahiligon mag-usisa sa mga maanindot nga tanom sa kinaiyahan.
Sa gidak-on niining 82 ektarya, makapangutana mo, unsa bay sud sa harden nga nabantog sa maong nasud?
Ginger Garden
Di monimos sa 550 ka mga klase sa ginger flower ang imung makit-an niining dapit. Mga ginger flower sa nagkadaiyang lugar sa kalibutan ang inyong makita didto.
Gawas sa mga ornamental nga tanom nga inyong makita sa harden, aduna usab kini makaon nga mga klase sama sa luy-a nga maoy gamiton sa pagluto.
Ang mga ginger flower mamuwak sa tibuok tuig apan nahibaw ba mo nga mas mamungingi ang buwak niini gikan sa buwan sa Hunyo hangtod Agusto?
Nasuta ning manunulat nga labing nindot tan-awon ang mga ginger flower inig ka buntag ug hapon.
National Orchid Garden
Kon orchids lang ang hisgutan, lingawon ang inyong mga mata sa National Orchid Garden.
Nahibaw ba mo nga di mominos sa 600 ka klase sa mga hybrid nga orchids ang inyong makita didto?Gawas niini, aduna sab silay mga hybrid nga orchids nga ginganlan gikan sa mga sikat nga artista ug mga inilang tawo nga nibisita sa harden.
Ang pipila sa mga sikat nga orchid nga inyong makita didto mao ang Golden Shower o Dancing Lady Orchids, tiger orchids ug ang gingerbread tree.
Siguroha nga magbawon kamu og daghang tubig, saktong baterya sa inyong camera tungod kay bisan asang anggulo sa tulo ka ektaryang harden, picture ug selfie spot man.
Evolution Garden
Halapad nga mga klase sa mga tanum gikan pa sa sinugdanan sa kalibutan ang inyong makita sa evolution garden.
Gikan sa mga karaan nga kahoy, mga ammonite fossils (o mga bukog) sa mga hayop niadto, mga fern, ug koleksyon sa cycads ang pipila sa inyong makita didto.
Kon mosud kamo sa Evolution Garden, sama sa nibalik kamo sa karaang panahon sa kalibutan.
Base sa among kasinatian, daw sama sa nisud kami sa mga Science books nga gitun-an namu sa dihang nagtungha pa kami sa grade school.
Heritage Trail
Gitukod niadtong 1859 sa usa ka Agri-Horticultural Society, ang Singapore Botanic Garden gidisenyo ni Lawrence Niven kinsa ang nagpakita sa iyang English Garden Style nga maoy nakaimpluwnesya sa nagkadaiyang English nga landsape garden ug parks sa iyang panahon.
Ang heritage trail maoy balay sa tulo ka mga historial halls diin ang nabantog niini mao ang Burki Hall, siyam ka landmarks ug 29 ka mga heritage ug sikat nga kahoy.
Ang heritage trail maoy nagpakita sa sinugdanan sa harden. Gani, daghang mga turista ang mobisita didto tungod kay kini mingaw ug may playground sa mga bata.
Perfect spot usab kini sa mga managĀtrato kon mopahigayon sa ilang mga pre-nup shoot.