HANGTUD karon dili pa gihapon maapsan sa mga taga Manila ang huna-huna sa atong Pangulo nga si Rodrigo Duterte kay nagkabuang gihapon sila’g analisar sa mga ipagawas nga pamahayag niini.
Akong gitumbok ang labing ulahing kontrobersiyal nga pamahayag sa Pangulo labot niadtong anaa kini sa eroplano pauli dinhi sa Pilipinas gikan biyahe’g Japan nga matud pa sa pangulo gihunghungan kuno siya sa Ginoo nga dili na siya pabalikason.
Unang mipagawas ug kritisismo mao ang gikan sa Katolikong Simbahan nga maoy akong relihiyon.
Matud pa sa usa ka Obispo nga kadtong naghunghung sa pangulo dili kuno iya sa Ginoo tungod kay mga mistiko ug balaan lamang nga mga tawo ang istoryahon sa Ginoo.
Buot ipasabot nagtuo gayud ang maong Obispo nga dili maayong tawo si Pangulong Duterte ug wala kini katungod nga makig-istorya sa Langitnong Amahan.
Daghang pari, pastor, ug uban pang tigpangalagad sa Ginoo ang wala pa gayud makabati og tingog sa Ginoo. Buot ipasabot nga gamay lamang kanila ang mistiko ug balaang tigpangalagad sa Diyos.
Apan nahibulong ko ug ambot tinuod ba kining panudlo sa atong mga tigsangyaw nga bisan og ordinaryong tawo mamahimong makig-istorya sa atong Ginoo tungod kay wala Siyay gipili, mabalaan man, kabus, adunahan, may diperensiya sa lawas, dili magtutuo ug uban pa.
Usa sa akong kanunay nga mabati nga nakig-istorya kaniya ang Amahan mao si Reverend Pastor Apollo Quiboloy ug ako siyang gituhoan kay bisan si Pangulong Duterte miingon nga lahi na ang aura karon Pastor Q ug gikonsiderar niya kining balaan.
Kini ang gitawag nga conviction... dili matungkad sa ordinaryong tawo apan walay makakuwestiyon niini.
Natingala lamang ako nga sa tanang sagradong timailhan... ang unang dili motuo mao ang kaparian sa Romano Katoliko.
Moagi pa sa ilang halawom nga imbestigasyon ang giingong milagro nga gipakita sa Kahitas-an una sila motuo nga dunay milagrong nahitabo ug sagad niini dili gayud nila tuhoan.
Kon sabagay daghan na ang nangilad karon nga gamit ang ngalan sa Ginoo. Kini ang gitawag sa bugoy nga “racket for the lord.”
Apan walay mawala kanato kon motuo kitang gihunghungan gayud si Pangulong Duterte sa Ginoo o konsensiya ba niya ang nagtukmod nga usbon na niya ang mga pulong nga moligdas sa iyang mga ngabil o paagi ba kini sa pangulo aron hatagan niya’g hustisya ang iyang pagbag-o.
Alang kanako usa kini ka milagro kon may kausaban gayud si PRRD nga dili na siya mamalikas kay iya nang nabatasan nga mamalikas kon duna siyay kaligutgutan.
Hinumdoman nato nga si Hesukristo sa iyang pagsulod sa Nazareth nga gihimong balay kalingawan ang simbahan.