NAAY Executive Order (EO) si Presidente Rodrigo Duterte nga himuong smoking ban nationwide kun dili na makapanigarilyo sa tibuok Pilipinas. Nagsugo kini sa mga local government units (LGUs) sa pagpatuman sa Republic Act 9211 (An Act regulating, use, sale, distribution and advertisement of tobacco products and other purposes) nga naila nga Tobacco Regulation Act of 2003.
Aduna na man untay ordinansa ang daghang mga LGUs kalabut niini apan wa pa gihapon kini mapatuman. Wa pa sad hinuon hingpit napatuman kining maong EO.
Nagtuo ako nga mas epektibo kining EO ni Pres. Duterte itandi sa mga ordinansa sa nagkalainlaing LGU kay mahadlok man ang mga tawo sa presidente. Gikinahanglan pa hinuon ang implementing rules and regulations kon asa dili makapanabako ug asa gitugutan ang pagpanabako. Apil diay niini ang electronic cigarettes kay naa gihapon kini sagol nga nicotine.
Sayud kita nga ang mga kompaniya sa tabako ug sigarilyo mo-lobby aron dili kini mapatuman. Kon epektibo na kining napatuman ni Pres. Digong didto sa Davao City, motuo kaha kaniya ang ubang katawhan sa Pilipinas?
Uyon hinuon ako niini tungod kay ato nang nasayran nga bisan ang wa manigarilyo apan makahanggap lang sa gibulhot nga aso masakit usab og cancer. Nagpaabut ako nga tinud-on kini ni Pres. Duterte alang sa kaayuhan sa panglawas sa atong kaigsuonan.
Pag-resign ni FVR
Mitamud ako sa pagkatawo ni kanhi presidente Fidel V. Ramos apan wa ako makauyon sa kalangay sa iyang pag-resign isip special envoy to China.
Ang akong gipaabut nga kon ang usa ka dakung opisyal sa gobiyerno wala na makauyon sa binuhatan ug palisiya sa presidente, kinahanghang modimitir kon mo-resign dayon siya sa iyang katungdanan gawas kon siya pinili sa katawhan ug dili appointed sa presidente.
Sayud kita nga si ex-president Ramos usa ka American boy kun Amboy. Sa ato pa kon papilion siya kon kinsa ang atong sandigan sa atong foreign policy, iya gayud nga pilion ang Estados Unidos (US).
Ang ako usab nga gikahibudngan ni Pres. Digong kay wa gayud siya mosaway kang Ramos bisan kon iya nang gidawat ang resignation niini. Di man gud ginhapon sa presidente nga dili sawayon ang mga tawo nga mosupak kaniya.
Ang uban nagtuo nga tungod kini sa respito ni Duterte kang Ramos nga maoy iyang gipasalamatan sa iyang paglansar sa pagka-presidente. Ako hinuon lain og pagtuo. (msr1144@yahoo.com)