HELLO November! Pagdayeg ug pasalamat sa Ginoo ang gibati ko nga buhi pa kitang tanan, mga igsuon ko!
Pila ka tulog na lang, pasko na usab. Ang pag-ulan sa matag-gabii nakahatag kanako og maayong pagkatulog, mare, apan nasayud ko nga daghan pod ang nagahangyo sa Kalangitan nga kung mahimo alas onse o dose na motulo ang ulan kay apektado gayud ang ilang mga panginabuhian sa kadalanan.
Ang mga kaigsuonan nato sa Night Market ang labaw’ng apektado. Ang kadaghanan kanila nahumod sa ulan bisag lalom na ang kagabhion kay naningkamot mokita, igsuon.
Anyway, let’s hope together and pray nga sa umaabot nga mga adlaw ang pabor ug grasya sa Kalangitan kanato molabaw aron dili nato kinahanglan motrabaho’g bug-at sama sa kabaw.
Niadtong nilabay’ng Sabado, nakoronahang Miss Earth 2016 si Katherine Espin, representate sa nasud Ecuador. Ubay-ubay’ng mga guwapang dalaga sa nagkadaiyang nasud ang nagtigi sa korona apan ang kahigayonan gipadaug si Miss Ecuador nga usa ka modelo ug abogada.
Apil ko sa kadaghanan nga nalingaw sa pagtan-aw sa telebisyon ug gibati ko nga gibuhat sa tanang kandidata ang ilang makaya ug deserving ang tanang ningdaug, miga.
Ang bisan unsang titulo nga susama sa Miss Earth nga kompetisyon dili lang puros paguwapa apan dakung responsibilidad sa ilang mga abaga.
Ang mahimong tingog sa kababayen-an ug pag-awhag sa kadaghanan nga mahimong kabahin sa pagprotekta sa kinaiyahan ug pagbaton og malinawong kalibutan ang pipila sa ilang mga kampanya nga ginaasdang.
Gawas sa pagdaug sa korona ug titulo, ang mga beauty queen kinahanglan mas beautiful og kinaiya, higala ug sukwahi kini sa gipakita ni Imelda Schweighart nga kandidata sa nasud ta.
Ang pagsulti niya nga peke ang ilong, baba ug dughan ni Espin nabidyohan ug nakatag sa social media, mga darling. Dili kini ang hustong pamatasan sa usa ka beauty queen nga nagarepresenta sa Pilipinang kababaihan.
Kita tanan naka-eksperyensiya’g kapildido apan dili ni angayan nga moguba kanato. Seguro adunay mga tawo nga sige'g kadaug sa bisan unsang kompetisyon, migo, apan we cannot be winners all the time. Dili gayud ta pirming daug mao dili dapat motikig ang atong liog sa kahambog.
Dili nako kini ginahisgutan agi’g pandaut kay Schweighart nga atong kababayan. Ako ning gituki kadali aron atong saluhan ang sitwasiyon diin puwede kitang mobuhat og kaayohan.
“Winning is not everything,” matud pa mao sa bisan unsang resulta sa contest nga apilan ta – lets just get better and not bitter, miga.