MATANAO, Davao del Sur - Gikasohan sa mga ginikanan sa 10 ka mga tinun-an ang usa ka maestro sa publikong tunghaan human mitug-an ang ilang mga anak nga gimolestiya niini.
Sumala pa nga nahitabo ang pag-molestiya sa mga tinun-an sa Grade 8 ug 9 sugod niadtong pagbukas sa klase, Hunyo ning tuiga.
Apan nasayran nga niining pipila ka adlaw lamang misumbong ang ilang mga anak human gihagbong sila sa gradong 72 porsiyento gikan sa magtutudlo nga gitago sa ngalang "Petra."
Matud sa tinun-ang si John (di tinuod nga ngalan), diha pay higayon nga katulo siya nahilabtan ug gibayaran og P150 bugti sa kalipay nga ilang gisaw-an sa iyang maestro.
Ang uban kon medyo ambongan, bayaran sab kini og P500 ug ang bugaw naa ra sab sa ilang mga lalaking klasmeyt nga nahimong tulay sa negosasyon.
Wa sab nahimo ang tinun-ang si alyas Mark human pugsanong gium-um sa maestro ang iyang pribadong bahin sa lawas ug human naangkon ang kalipay nakadawat na siya og P100 nga bayad sa magtutudlo.
Di madawat sa inahang si Maria (di tinuod nga ngan) ang pag-abuso sa iyang anak ilabi ma nga apil kining nabagsak bisan og utukan sa klase.
Nahitabo ang pagbagsak human nagdumili na ang mga menor edad nga nagpangedaron og 14 - 16 anyos sa paghatag og lawasnong kalipay sa magtutudlo.
Unang gipaabot sa mga ginikanan ngadto sa Department of Education (DepEd) sa probinsiya ang reklamo diin gihikay na sab ang kasong administratibo batok sa maestro.
Samtang niadtong Biyernes, gibutyag ni Police Officer 2 Cristina Lupera, imbestigador sa Women and Child Protection Desk (WCPD) sa Matanao Municipal Police Station, nga naduso na nila ang kasong paglapas sa Republic Act 7610 kun Child Abuse batok sa gireklamong magtutudlo.
Samtang gibutyag sab sa ubang tinun-an nga migraduwar na sa tunghaan nga dugay rang nahitabo ang pag-abuso kanila apan wa mopasaka og reklamo ilabi na nga nakadawat sila og salapi nga nadugang sa ilang baon.
Ning higayona, mismong mga ginikanan na ang agrabyado mao nga gipasaka ang kaso batok sa maestro.