SILA Sonny Wagdos ug Mae Barit ang mikampeyon sa 21k men’s ug women’s dibisyon sa 40th Milo Marathon Davao Leg nga nagsugod ug nahuman sa SM Lanang Premier Parking Lot niadtong Dominggo, Nobyembre 6.
Malampuson nga nadepensahan ni Wagdos ang iyang titulo human mihuman og usa ka oras, 16 minutos ug 15 segundos batok nila Michale Jan Echalico (01:17:10) ug Arlan Arbois (01:19:40) alang sa sunod nga duha ka puwesto sa lalaki nga dibisyon.
Samtang, si Barit nakoronahan dihang mitala og 01:51:45 dayon gisundan ni Madelyn Carter og 01:33:16 ug ikatulo si Olive Firmeza nga 01:54:58.
Apan luyo sa ilang kadaugan, wala sila nikuwalipika alang sa National Finals nga himuon sa Iloilo karong Disyembre 4.
Matod ni Wagdos, estudyante sa University of Mindanao, “Wala ko ni-qualify kay midugang sila og 200 meters sa rota tapos danlog ang dalan tungod kay ulan. Wala sab koy training sud sa 1 month kay ang injury nako mibalik,” atol sa pakighinabi sa SuperBalita Davao una nagsugod ang awarding.
Hinoun, dugang ni Sonny kun ugaling nakasulod siya, di gihapon siya modagan sa nasyonal.
“Wala sab ko plano mag-nationals kay ipahulay sah nako ang tiil, walaon ang injury. Ingon sa doktor, kailangan og 2 ka bulan aron mawala.”
“Medyo naglisud ko kay tungason kaayo ang rota tapos nag-cramps akong duha ka bagtak pero naka-rekober ko, lisud gayud ang rota. Wala sab ko nag-apas sa time para sa finals pero gihatag lang nako ang best, daug o pildi.” matod ni Barit.
Sa 10k, ang tulo nga midaog sa lalaki mao sila Agustin Ychow (35:20 minutos), Joerge Andrade (35:23) ug Jorge Esquirida (37:24) samtang sa babaye sila Diana Memoracion (43:37), Kim Glydell Barot (51:21) ug Jeralden Madayam (51:35).
Si Daryl Mark Daban midaog sa 5k men’s nga mioras og 17:10 kontra Derick De Gracia (17:21) ug Kim Corbeta (17:59) alang sa ikaduha ug ikatulong puwesto sa maong han-ay.
Sa babaye, si Andrea Annabela Deguia ang midomina nga dunay 21:15 nga mihuman sa lumba batok Annie Mary Depone (22:10) ug ikatulo si Rebecca de Gracia (23:40).
Sa 3k, ang tulo nga nanguna sila Jayson Apostol (10:51), Jayson Vergabera (11:26) ug Klyder Rule (11:46) alang sa lalaki samtang sa babaye mao sila Arlene Jane Onso (13:26), Sharon Gay Marcojos (14:52) ug Danica Ambat (15:14).
Mga midaog sa matag kategorya nakadawat og premyong kuwarta, tropeyo ug medalya.