DIGOS CITY -- Gipangita na sa mga sakop sa Women and Child Protection Desk (WCPD) ning dakbayan ang usa ka otso-anyos nga batang babaye human kalit nahanaw sa Barangay Dawis, alas 3 sa hapon, Miyerkules, Nobyembre 9.
Sa inisyal nga imbestigasyon sa WCPD, nasayran nga kuyog ang Grade 2 pupil nga nganlan lang nato og Mery, taga Barangay Kamutan, lungsod sa Antipas, North Cotabato, sa iyang mga ginikanan nga naligo didto sa Dano Consular Beach Resort sa lugar.
Nangaligo sa dagat ang pamilya niadtong higayona apan mihangyo ang anak ngadto sa iyang amahan nga mopalit og ice cream sa suroy-suroy nga tigbaligya sa lugar.
Gumikan niini, mibiya ang amahan sa anak aron moadto sa cottage kay mokuha og salapi.
Apan dihang mibalik ang amahan sa baybayon kalit nahanaw ang iyang anak ug wa na kini igkita sa palibot.
Gilayong nagpakitabang ang amahan sa Digos City Police Office (DCPO) aron pangitaon ang anak nga nagsul-ob og maong nga short pants ug backless nga lavender blouse niadtong higayona.
Sumala sa kapulisan nga "ilongga" ang sinultihan sa bata, maulawon, mga 11 pulgada ang gitas-on, taas ang buhok ug kasarangan ang lawas.
Nanawagan sab ang amahan sa publiko nga gilayong itaho sa kapulisan kon ugaling makit-an nila ang babayeng menor. (Orlando B. Dinoy)