HUGOT nga seguridad ang gimando ni Misamis Oriental Governor Yevgeny Emano sa padangaton nga kasaulogan sa Semana Santa denhi sa tibuok probinsya sa Misamis Oriental.
Gibutyag niini nga ang Oplan Semana Santa gipangulohan mismo ni Dra. Bebina T. Casiño ug Misamis Oriental Provincial Police Officer Leonilo Cabug.
Matud ni Emano nga sa mokabat 23 ka mga lungsod ug duha ka mga siyudad sa Gingoog ug El Salvador, adunay silay ipahimutang nga tent diin adunay ibutang usa ka doctor ug nurse, uban sa personahe gikan sa LGU matag lungsod kini aron magdawat sa mga nanginahanglan atol sa kasaulogan.
Dugang niini, ilang gitutokan usab pag-ayo ang siyudad sa El Salvador diin nahimutang ang Devine Mercy Shrine nga maoy sagad dagsaan sa mga magpenetensya.
Gipaalerto na usab nila ang kapolisan nga magbantay sa dapit apil usab adunay tent nga doulan sa mga tao kung aduna silang mga panginahanglan.
Samtang apil sa ilang gipabantayan mao ang Sipaka Point sa lungsod sa Talisayan diin gapunsisok ang magpenetensya panahon sa Semana Santa.
Sagad dagsaan kini sa katawhan panahon sa Huwebes Santo ug ngani moabot sa 50 mil ka tao ang mosaka niini hinungdan hugot nga seguridad usab ang ilang gipatuman niini.
Matag tuig, adunay kausaban sa sipaka point. Gimandoan usab ni Emano ang kapolisan labina pagbantay diha sa pantalan sa lungsod sa Balingoan tungod kay denhi gasumikad ang katawhan nga motabok paingon sa Camiguin Island.
Matud ni Emano nga andam na ang tanan nga seguridad nga ilang ihatag sa katawhan ug nanghinaot kini nga malinawon ang kasaulogan sa Semana Santa.