PAGPAAMBIT sa gugma ug kaluoy sa Ginuo ngadto sa nanginahanglan sama sa mga binilanggo ug drug surrenderees ang mensahe sa Tuig sa Kaluoy ni Cebu Archbishop Jose Palma sa iyang pagsirado sa pultahan sa kaluoy sa Cebu Metropolitan Cathedral, dakbayan sa Sugbo kagahapon.
Ang mahuloganon pagsira sa holy door o Jubillee door sa pinili nga mga simbahang Katoliko sa tibuok kalibotan timailhan nga natapos na ang Extraordinary Jubilee Year of Mercy ug ang pagsulod sa tuig sa parokya isip Communion of Communities.
Ang pormal nga pagsugod sa tema nga Communion of Communities ilusad atol sa Christ The King karong Dominggo, Nobiyembre 20, pinaagi sa prosisyon nga gikan sa Capitol human sa misa padulong sa Cathedral.
Sa iyang wali, si Palma nipahinumdom sa mga tawo nga nanginahanglan sila sa kaluoy sa Diyos kay atubangan Niini, sila makasasala.
Matod niya nahagit ang kaluoy sa mga tawo gumikan sa kadaghan sa mga drug surrenderee.
Si Palma nidugang gumikan sa pagkadako sa hagit kinahanglan magkahiusa ang katawhan gumikan kay ang liboan ka drug surrenderees nga unang nitahan gipaabot mosaka og minilyon ug kinahanglan mahatagan og mga tubag ug solusyon sa lainlaing sektor.
“Sa atong pag-experience sa kaluoy sa Diyos, dal-on nato kining kaluoy sa atong kaigsuonan,” pag-awhag ni Palma sa mga tawo.
Si Pope Francis nibukas sa balaan nga pultahan sa St. Peter's Basilica sa Roma niadtong Disyembre 8, 2015, pagsugod sa Jubilee Year of Mercy.
Dinhi sa Sugbo, gawas sa Cathedral gitudlo usab ang Jubilee Churches nga nagbukas ug nagsirado sa balaan nga pultahan sama sa Archdiocesan Shrine sa St. Catherine of Alexandria sa Carcar City, Archdiocesan Shrine sa San Vicente Ferrer sa Bogo City, Saints Peter and Paul Parish sa Bantayan Island ug St. Joseph Parish sa San Franciso, isla sa Camotes.
Sa pagsirado sa balaang pultahan, gipapilit ni Palma ang 15-anyos nga brick nga maoy gigamit ni Saint John Paul II dihang gisirad-an ang holy door sa St. Peter's Basilica niadtong 2001.