MALITA, Davao Occidental -- Plansado na ang tanang aktibidades alang sa tinuig nga Gaginaway Festival nga saulogon karong Miyerkules, Nobyembre 17.
Ang Gaginaway ginasaulog sa mga Malitaneous matag takdol ang bulan base sa pinulongang Tagacaolo nga "panagtapok" samtang sa tribung B'laan nagpasabot og "gugma."
Gibutyag ni Marivic Hubac, executive assistant V ni Davao Occidental Governor Claude Bautista nga ang mga netibo sa Malita adunay susamang kultura nga magtapok sa usa ka lugar diin ilang sud-ongon ang kanindot sa bulan ug klima.
"That's why Gaginaway is celebrated in November when the moon is believed to be at its brightest, and the harvests of the tribes are bountiful, thus, the reason to celebrate," asoy ni Hubac.
Nanimuyo sa Malita ang tulo ka mga tribu diin ang Tagacaolo anaa sa bukirang bahin, Manobo sa ubos nga bahin ug mga B'laan sa bukirang bahin sa Little Baguio.
Anaa sab ang tribung Muslim nga midayo sa lugar ug nanimuyo sa daplin sa kadagatan sa lugar.
Gawas sa ubang tribu, daghan na nga mga bisaya ang nanimuyo sa patag ug bukid nga bahin sa Malita tungod sa nindot nga panginabuhian, sumala ni Hubac.
Ang kasaulogan hiusahon nga i-selebrar sa nagkadaiyang tribu nga gisuportahan sa lokal nga gobyerno, apil ang mga opisyal sa 33 ka mga barangay.
Gidason ni Hubac nga pinaagi sa Gaginaway magkahiusa ang tanang molupyo sa lungsod timailhan nga anaa ang kalinaw, gugma ug respeto sa matag usa.
Sa Miyerkules sa gabii, gilauman sab nga mopadala og daghang artista si Governor Bautista aron mohatag og lingaw sa katawhan isip pasalamat sa padayong pag-suporta sa tanan nilang programa alang sa kalamboan, dili lang sa lungsod kon di sa tibuok probinsya. (Orlando B. Dinoy)